Россияда бошпанага эга бўлган АҚШ Миллий хавфсизлик агентлиги собиқ ходими Эдвард Сноуден фикрича, Давлат думаси томонидан қабул қилинган тузатишлар «иш бермайди ва асоссиз равишда инсон ҳуқуқларини бузади». Бу ҳақда «РБК» хабар берди.
Сноуден ўзи «Катта ака» (Жорж Оруэллнинг «1984» китобида тавсифланган ялпи кузатув тизими) деб атаган қонун лойиҳаси ҳеч қачон имзоланмаслиги керак, деб ҳисоблайди.
Алоқа операторлари ва интернет компаниялардан фойдаланувчиларнинг матнли хабарлари, суҳбатлари, шунингдек, тасвирлар, овозлар, видео ва бошқа хабарларни олти ойгача сақлашни талаб қилиш, Сноуден фикрича, шунчаки хавфли эмас, номувофиқ ҳамдир.
«Ялпи кузатув иш бермайди. Қонун лойиҳаси ҳар бир россияликнинг пули ва эркинлигини олиб қўяди, аммо бу билан хавфсизлик даражаси ошмайди», — дея ишонч билдирди Сноуден.
24 июнь куни Россия Давлат думаси депутат Ирина Яровая ва сенатор Виктор Озеров томонидан киритилган аксилтеррор қонун лойиҳасини иккинчи ва учинчи ўқишда қабул қилди. Ушбу лойиҳа ахборот тарқатиш ташкилотчиларини маълумотлар шифрланган тақдирда махсус хизматларга уларни ўқиш имконини берувчи манбаларни тақдим этиш мажбуриятини юклайди. Бундан бош тортилган тақдирда 1 миллион рублгача жарима кўзда тутилган.
Изоҳ (0)