Rossiyada boshpanaga ega bo‘lgan AQSh Milliy xavfsizlik agentligi sobiq xodimi Edvard Snouden fikricha, Davlat dumasi tomonidan qabul qilingan tuzatishlar “ish bermaydi va asossiz ravishda inson huquqlarini buzadi”. Bu haqda “RBK” xabar berdi.
Snouden o‘zi “Katta aka” (Jorj Oruellning “1984” kitobida tavsiflangan yalpi kuzatuv tizimi) deb atagan qonun loyihasi hech qachon imzolanmasligi kerak, deb hisoblaydi.
Aloqa operatorlari va internet kompaniyalardan foydalanuvchilarning matnli xabarlari, suhbatlari, shuningdek, tasvirlar, ovozlar, video va boshqa xabarlarni olti oygacha saqlashni talab qilish, Snouden fikricha, shunchaki xavfli emas, nomuvofiq hamdir.
“Yalpi kuzatuv ish bermaydi. Qonun loyihasi har bir rossiyalikning puli va erkinligini olib qo‘yadi, ammo bu bilan xavfsizlik darajasi oshmaydi”, — deya ishonch bildirdi Snouden.
24-iyun kuni Rossiya Davlat dumasi deputat Irina Yarovaya va senator Viktor Ozerov tomonidan kiritilgan aksilterror qonun loyihasini ikkinchi va uchinchi o‘qishda qabul qildi. Ushbu loyiha axborot tarqatish tashkilotchilarini ma’lumotlar shifrlangan taqdirda maxsus xizmatlarga ularni o‘qish imkonini beruvchi manbalarni taqdim etish majburiyatini yuklaydi. Bundan bosh tortilgan taqdirda 1 million rublgacha jarima ko‘zda tutilgan.
Izoh (0)