Франция Россияга нисбатан жорий этилган санкцияларни бекор қилган бўларди, бироқ ҳозир бунинг учун зарур шарт-шароит йўқ. Бу ҳақда, «РБК» хабарига кўра, Франция ташқи ишлар вазири Жан-Марк Эйро France 2 телеканалига берган интервьюсида айтиб ўтди.
Франция ташқи ишлар вазирининг сўзларига кўра, Париж Москвани «рақиб эмас, ҳамкор сифатида кўради». Унинг тушунтиришича, агар Украинадаги вазият юзасидан аниқ натижаларга эришилса, санкциялар бекор қилиниши мумкин, бироқ ҳозирча натижалар кўринмаяпти.
Парижнинг санкцияларни бекор қилиш истаги ҳақида 2016 йилнинг январь ойида Франция қишлоқ хўжалиги вазири Стефан Ле Фоль ҳам фикр билдирган эди. Унинг сўзларига кўра, буни мамлакат президенти Франсуа Олланд ҳам хоҳламоқда. Бу ҳолат Россиянинг озиқ-овқат эмбаргосини бартараф этиш имконини ҳам берган бўларди, деб ҳисоблайди Ле Фоль.
Аввалроқ Франциянинг Москвадаги элчиси Жан-Моррис Риппер ҳам Париж Россияга нисбатан санкциялар имкон қадар тезроқ бекор қилинишини хоҳлаётганини маълум қилган эди. Унинг сўзларига кўра, бу масала Минск келишувларининг бажарилиши билан боғлиқ.
Изоҳ (0)