Темпл университетининг Камел Халилий раҳбарлигидаги бир гуруҳ молекуляр биологлари CRISPR/Cas9 генларни таҳрирлаш технологияси ёрдамида биринчи марта тирик жониворлар геномидан ОИВ (Одам иммунтанқислиги вируси)га оид ДНК сегментини олиб ташлашга муваффақ бўлди. Иш натижалари Gene Therapy журналида чоп қилинди. Пресс-релиз университет сайтига жойланди.
Олимлар аввалги тадқиқотларида CRISPR/Cas9 тизими хўжайин ҳужайра геномидаги вирус генини, салбий оқибатларсиз, олиб ташлашга қодирлигини кўрсатиб бера олган эди. Аммо бу усул тирик организмда иш бериш-бермаслиги номаълум эди.
Сўнгги тажрибасида олимлар генни таҳрирлаш технологияси ҳар бир органининг ҳар битта ҳужайрасига вирус генлари киритилган трансген сичқон ва каламушлар организмидан ОИВни бартараф қила олишини текшириб кўрди. Вирус генларини ўчириш учун модификацияланган CRISPR тизимини ҳайвонларга киритиш учун аденовирус векторидан фойдаланди, у зарур нуклеотид изчилликка, шунингдек, Cas оқсили генларига эга молекуладир.
Икки ҳафтадан сўнг тадқиқотчилар жониворлар геномларини таҳлил қилиб кўрди. ОИВ сегменти ҳар битта тўқимадаги ДНКдан олиб ташланган эди. Вирусли РНК (рибонуклеин кислотаси) таҳлили унинг миқдори лимфоцитлар ҳужайраларида, шунингдек, лимфа тугунларида кескин камайиб кетганини кўрсатди.
Изоҳ (0)