Fransiya tashqi ishlar vaziri Rossiyaga nisbatan sanksiyalarni bekor qilish uchun zarur shart-sharoit yo‘qligini bildirdi

Fransiya Rossiyaga nisbatan joriy etilgan sanksiyalarni bekor qilgan bo‘lardi, biroq hozir buning uchun zarur shart-sharoit yo‘q. Bu haqda, “RBK” xabariga ko‘ra, Fransiya tashqi ishlar vaziri Jan-Mark Eyro France 2 telekanaliga bergan intervyusida aytib o‘tdi.

Fransiya tashqi ishlar vazirining so‘zlariga ko‘ra, Parij Moskvani “raqib emas, hamkor sifatida ko‘radi”. Uning tushuntirishicha, agar Ukrainadagi vaziyat yuzasidan aniq natijalarga erishilsa, sanksiyalar bekor qilinishi mumkin, biroq hozircha natijalar ko‘rinmayapti.

Parijning sanksiyalarni bekor qilish istagi haqida 2016-yilning yanvar oyida Fransiya qishloq xo‘jaligi vaziri Stefan Le Fol ham fikr bildirgan edi. Uning so‘zlariga ko‘ra, buni mamlakat prezidenti Fransua Olland ham xohlamoqda. Bu holat Rossiyaning oziq-ovqat embargosini bartaraf etish imkonini ham bergan bo‘lardi, deb hisoblaydi Le Fol.

Avvalroq Fransiyaning Moskvadagi elchisi Jan-Morris Ripper ham Parij Rossiyaga nisbatan sanksiyalar imkon qadar tezroq bekor qilinishini xohlayotganini ma’lum qilgan edi. Uning so‘zlariga ko‘ra, bu masala Minsk kelishuvlarining bajarilishi bilan bog‘liq.