Европада хавфсизлик ва ҳамкорлик ташкилоти Донбассда сайловлар ўтказишда ёрдам бериш учун Украина жануби-шарқига қуролланган полиция миссиясини юбориш имкониятини кўриб чиқмоқда. Бу ҳақда ЕХҲТ бош котиби Ламберто Заньер маълум қилди, деб ёзади Associated Press.
Миссия мамлакат раҳбарияти, шунингдек, Донецк ва Луганск халқ республикалари ҳукуматлари розилиги билангина иштирок этиши мумкин.
Заньернинг сўзларига кўра ташкилот сайловларда хавфсизликни таъминлаш учун юзлаб қуролли ходимларни юборишга тайёр. «Ушбу полиция операцияси ҳудудда қонун ва тартибни сақлаб туриши, шунингдек, сайловларни ўтказиш учун хавфсиз шароитларни таъминлаб туриши мумкин бўларди», — деди ЕХҲТ бош котиби.
18 май куни Украина Марказий сайлов комиссияси раҳбарияти Донбасснинг Киев назорати остида бўлмаган ҳудудларида камида икки йилдан кейингина сайлов ўтказиш мумкин бўлишини айтган эди. Аввалроқ эса Украина президенти Пётр Порошенко ДНР ва ЛНРда сайловларни фақат ЕХҲТ полиция миссияси ёрдамидагина ўтказиш мумкинлигини таъкидлаган эди.
Изоҳ (0)