Avstriya politsiyasi Yevropaga qochoq tarzida kirib kelgan va sheriklari bilan birga 2015-yil 13-noyabrdagi Parij teraktlarida ishtirok etishni rejalashtirgan IShIDning ikki nafar terrorchisini qo‘lga oldi. Bu haqda “TASS” xabar bermoqda.
The Washington Post manbalariga ko‘ra, 23 yoshli pokistonlik Muhammad Usmon va 28 yoshli jazoirlik Odil Haddodiy Turkiya orqali Gretsiyaning Leros oroliga keyinchalik Stade de France stadionida o‘zini portlatgan ikki nafar iroqlik xudkush terrorchi bilan birga, suriyalik qochoqlarning katta guruhi tarkibida noqonuniy ravishda kelgan.
IShIDdan Fransiya poytaxtida teraktlar uyushtirish bo‘yicha maxsus topshiriq olgan bu 4 shaxsda ham qalbaki pasportlar bo‘lgan va ular o‘zini suriyalik sifatida tanishtirgan. Agar Usmon va Haddodiy Parijga yetib borganda terakt qatnashchilari soni 9 emas, 11 kishiga etgan va qurbonlar soni yanada ko‘paygan bo‘lardi.
IShIDga 2014-yili a’zo bo‘lgan pokistonlik va jazoirlik ikki iroqlikdan farqli ravishda Gretsiya rasmiylarida shubha uyg‘otgani sababli mamlakatdan chiqarib yuborilgan va Parijga yetib bormagan. Ular Yevropa bo‘ylab uzoq tentirishdan so‘ng Avstriyaning Zalsburg shahridagi qochoqlar lageriga borib qolgan va Parijdagi hujumlar tafsilotini o‘rganayotgan fransuz hamkasblari ma’lumotlariga tayangan mahalliy politsiya tomonidan qo‘lga olingan. Maxsus xizmatlar Usmon va Haddodiyni so‘roq qilgan hamda ulardan Zalsburgdagi lagerda yana ikki gumonlanuvchini hibsga olishga imkon bergan qimmatli ma’lumotlarni olgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)