Швейцария полицияси «Панама ҳужжатлари» чоп қилинганидан сўнг, УЕФАнинг Ньондаги офисига тинтув учун келди, дея хабар бермоқда «РБК». Ушбу ҳужжатларда ФИФАнинг янги президенти ва УЕФА собиқ бош котиби Жанни Инфантино номи тилга олинади.
Полицияни эгалари Уго ва Мариано Хинкинс бўлган Cross Trading компаниясига Чемпионлар лигаси матчларини трансляция қилиш ҳуқуқи сотилиши билан боғлиқ ҳужжатлар қизиқтирган. Уларга ҳам Инфантино имзо қўйган.
Тинч океанидаги Ниуэ оролида рўйхатга олинган Cross Trading офшор компанияси бундай ҳуқуқни сотиб олиш учун УЕФАга 111 минг доллар тўлаган. Шу билан бирга, ҳуқуқ Teleamazonas компаниясига 311 минг долларга қайта сотилган, бу ҳақда «Панама ҳужжатлари»да айтилади.
УЕФА тинтувларни изоҳлар экан, ҳуқуқни ҳимоя қилиш органлари билан тўлиқ ҳамкорлик қилаётганини айтди. Инфантинонинг ўзи аввалроқ «унинг ҳалоллиги шубҳа остига олинганидан ташвишда» эканлигини билдирган. У, шунингдек, шартномани имзолаётиб, қонунни бузмаганини таъкидлаган. Бундан ташқари, УЕФА Cross Trading офшор компанияси Teleamazonas компанияси учун воситачи ролини ўйнаганини қайд этган.
Изоҳ (0)