2 апрель куни Хильде Кейт Лисьяк исмли тўққиз ёшли америкалик қизча ижтимоий тармоқларда Пенсильвания штати Силинсгроув шаҳридаги қотиллик дея тахмин этилаётган ҳодиса юз берган жойда олинган репортажини эълон қилди, деб ёзади TJournal. Қизча ўзининг журналистлик амалиёти учун танлаган мавзу интернет фойдаланувчилари ғазабига учради.
Хильде New York Daily News собиқ мухбири бўлган отаси изидан бориб, дарсдан бўш вақтларида Orange Street News деб номланган шахсий янгиликлар нашри билан шуғулланади. Нашр Силинсгроув шаҳридаги воқеалар ҳақида ҳикоя қилади. Одатда у ердаги репортажлар ва хабарлар Тейлор Свифтнинг шаҳарга ташрифи, шаҳарда рўй берган вандализм ёки полиция томонидан ўлдирилган қоидабузар скунс кабиларга бағишланган бўлади.
Аммо 2 апрель куни Лисьяк сайтга воқеа жойидан олинган «эксклюзив репортаж»ини жойлади: гумонланувчи, нафақадаги мактаб ўқитувчиси, ўз хотинини болға билан ўлдирганлиги тахмин қилинмоқда.
Қизча нафақат тўсиб қўйилган уйга келган, балки полиция ва марҳумнинг қўшниларидан ҳодиса юзасидан изоҳлар олган.
Репортаж интернет фойдаланувчилари диққатини тортди. Улар ўз қизининг бундай фаолиятини қўллаб-қувватлайдиган ота-онани танқид остига олди, Лисьякка эса «қўғирчоқлари билан ўйнаш»ни маслаҳат берди.
Қизча эса ўз нашри орқали танқидчиларга жавоб қайтарди ва унинг тўққиз ёшда эканлиги мухбирлик қилишига тўсқинлик қила олмаслигини таъкидлади.
Лисьякни қўллаб-қувватлаганлар ҳам топилди, улар қизнинг маҳоратини алоҳида тилга олди: ўз мақолаларида у «қотилликда тахмин қилинаётган шахс» ва «гумонланувчи» каби тўғри таърифларни қўллаган.
Хильденинг ота-онаси у ўз лойиҳаси устида тинмай ишлашини айтиб, унга қаратилган бундай танбеҳлар қизга ҳақоратли бўлиб туюлишини таъкидлади.
Келажакда ҳам қотилликларни ёритиш-ёритмаслиги ҳақидаги саволга жавобан, қиз муштарийларига Orange Street News’нинг кейинги сонини кутишни маслаҳат берди.
Изоҳ (0)