Япония ракета учириш режаси туфайли Шимолий Кореяга эътироз билдирди

Япония Ташқи ишлар вазири Фумио Кисида КХДРнинг сунъий йўлдошли ракета учирмоқчи бўлаётганлиги юзасидан эътироз билдирганлигини баён қилди. Бу ҳақда «РИА Новости» хабар қилмоқда.

Япония парламенти қуйи палатасининг бюджет ишлари бўйича қўмитасининг мажлисида иштирок этган вазир, эътироз хати Пекиндаги элчихона орқали юборилганлигини маълум қилди.

Давлатлар ўртасида дипломатик муносабатлар йўлга қўйилмаганлиги сабабли, Токиода КХДРнинг элчихонаси йўқ.

Эслатиб ўтамиз, Япония қуролли кучлари Шимолий Корея томонидан баллистик ракета учирилиши эҳтимолига жавобан қуруқликдаги комплекслар ва ракетага қарши ҳимоя тизимига эга кемаларни жанговар ҳолатга келтирганлиги хабар қилинган эди.