Халқаро арбитраж суди Эронга 2011—2015 йилларда Туркияга экспорт қилинган газ нархини 10—15 фоиз тушириш ва бир миллиард доллар атрофида товон пули тўлаш мажбуриятини юклади. Бу ҳақда Эрон нефть вазирининг ўринбосари Ҳамид Ризо Аракий маълум қилди, деб хабар беради «Корреспондент.net».
«Суд қарори якуний, аммо Эрон тўлаши лозим бўлган сумма ҳали аниқлангани йўқ», — деди Аракий. Унинг сўзларига кўра, компенсация бир миллиард доллар атрофида бўлади, томонлар товон пули қандай тўланиши масаласини кейинроқ ҳал қилади.
Теҳрон ва Анқара газ учун чегирмаларни ўзаро ҳал қилишга уринди, аммо томонлар бирор келишувга эришмагач, Туркия 2012 йилда Халқаро арбитраж судига мурожаат қилиб, Эрондан импорт қилинадиган газ нархини кўриб чиқишни талаб қилди.
Эрон Туркияга ўз газини 2001 йилдан бери сотиб келади ва йилига 10 миллиард куб метр газ етказиб беради. Бу борада у Россиядан кейин иккинчи ўринда туради. Эрон газининг нархи расман ошкор қилинмайди. ОАВлар хабарига кўра, унинг минг куб метри 490 долларни ташкил этади, бу Туркия Россия ва Озарбайжондан харид қиладиган газ нархидан баландроқдир. Туркия Эрон гази нархини 25 фоизга туширишни талаб қилмоқда.
Изоҳ (0)