Таиланд жанубида самолёт бўлаклари топилди, у Малайзия «Боинг»ига тегишли бўлиши мумкин

Таиланднинг жанубий соҳилларида самолёт бўлаклари топилди, улар 2014 йил мартида йўқолиб қолган Малайзия «Боинг»ига тегишли деб тахмин қилинмоқда. Бу ҳақда «ТАСС» хабар бермоқда.

Улкан қайрилма металл парчаси Накхонситхаммарт провинциясида қирғоққа чиқиб қолган, аҳоли уни аниқлаштиришда ёрдам сўраб ҳукуматга мурожаат қилган. Бўлакнинг катталиги энига икки метр, бўйига уч метрни ташкил қилган.

Топилма кўплаб тахминларни келтириб чиқарган, бироқ Таиланд ОАВлари унинг Малайзия «Боинг»ига тааллуқлиги бўлиши мумкинлиги ҳақидаги версияни илгари сурди. Расмий версия тақдим этилганича йўқ.

Malaysia Airlines’нинг Куала-Лумпурдан Пекинга учиб кетаётган самолёти 2014 йил 8 мартга ўтар кечаси радарлардан йўқолиб қолган эди. Кема бортида 239 киши бўлган.