Нурсултон Назарбоев Қозоғистон парламенти Мажлиси ваколатларини тўхтатиш ва навбатдан ташқари сайловлар санасини белгилаш тўғрисидаги фармонни имзолади
Қозоғистон президенти Нурсултон Назарбоев мамлакат парламенти Мажлиси депутатларининг ваколатларини муддатидан аввал тугатиш, Мажлисга навбатдан ташқари, барча даражадаги маслаҳатларга эса навбатдаги сайловларни ўтказиш тўғрисидаги таклифини кўриб чиқди. Бу ҳақда Tengrinews хабар бермоқда.
Давлат раҳбари мамлакат конституцияси талабига кўра, парламент палаталари раислари, бош вазир ва Конституциявий кенгаш раиси билан маслаҳатлашувлар ўтказган ва уларнинг натижаларидан келиб чиқиб, депутатлар ташаббусини қўллаб-қувватлашга қарор қилган.
«Мажлисга навбатдан ташқари сайловларни маслаҳатларга навбатдаги сайловлар билан бир пайтда ўтказилиши ҳам вақтни, ҳам молиявий манбаларни тежаш имконини беради. Давлат манфаатларига эътибор ва юксак тарихий масъулият учун барча депутатларга миннатдорчилик билдираман», — дея таъкидлаган Назарбоев.
Давлат раҳбари ҳокимиятнинг вакиллик тармоғи янгиланиши мамлакат ва халқ манфаати учун зарур эканлиги, сиёсий партиялар мушоҳадали, ишбилармон ва юрт шаънини кўзлаган, кун тартибидаги долзарб масалаларни ечишга қодир номзодларни илгари суриши лозимлигини билдирган.
«Бешинчи чақириқ парламент Мажлиси ваколатларини тўхтатиш тўғрисидаги фармонга имзо чекдим. Мажлисга навбатдан ташқари сайловлар 2016 йил 20 мартга белгиланди», — дея маълум қилган президент.
Нурсултон Назарбоев барча қозоғистонликларни давр тақозосига кўра қабул қилинган мазкур қарорни қўллаб-қувватлашга чақирди.
