UZREPORT TV телеканали 2015 йил 1 декабрдан ўз кўрсатув ва дастурларини «Ямал 401» сунъий йўлдоши орқали узатишни бошлади. Бу ҳақда UzReport хабар бермоқда.
«Сунъий йўлдош антеннасига эга ҳар бир юртдошимиз куннинг исталган вақтида, Ўзбекистоннинг исталган ҳудудида UZREPORT TV телеканалини томоша қилиш имкониятига эга бўлди», — дейилади хабарда.
Қайд этишларича, UZREPORT TV ташкил этилганидан бошлаб, телеканалнинг қамров ҳудудини кенгайтириш бўйича жуда кўп мурожаатлар келиб тушган. Ўзбекистоннинг турли ҳудудларидаги телетомошабинларнинг илтимосларини инобатга олиб, UZREPORT TV’ни сунъий йўлдошга олиб чиқиш бўйича салмоқли иш олиб борилди.
Маълумот учун, UZREPORT TV телеканали бизнес йўналишидаги кўрсатувлар, маърифий-оммабоп дастурлар билан бир қаторда, 2015 йилдан бошлаб футбол бўйича Европа Чемпионлар Лигаси ва Англия Премьер-лигаси учрашувларини жонли эфирда намойиш этишни бошлади.
UZREPORT TV телеканали сигналини қабул қилиш учун техник кўрсаткичлар
- Сунъий йўлдош — «Ямал 401», Ku диапазонининг 90 даража шимолий нури;
- Қабул частотаси — 11,505705 ГГц;
- Символ тезлиги — SR = 2280 ksps;
- Модуляция — DVB-S QPSK 1/2;
- Қабул поляризацияси — вертикал;
- Ажрата олиш ўлчами — стандарт (720 x 576i);
- Компрессия — MPEG-4;
- Тавсия қилинган антенна диаметри — 100 сантиметрдан ортиқ.
Изоҳ (0)