«Тошкент-Аэро» божхоначилари 2015 йилда қиймати 1,7 млрд сўмлик заргарлик буюмларининг ноқонуний олиб ўтилишининг олдини олди
«Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда тилла ва заргарлик буюмларининг ҳаво йўллари орқали ноқонуний олиб ўтилишига қарши чора-тадбирлар давом эттирилмоқда. Бу ҳақда «Тошкент-Аэро» ИБК Ахборот хизмати «Дарё»га хабар берди.
2015 йилнинг ўтган 10 ойи давомида «Тошкент-Аэро» ИБК ходимлари томонидан ҳуқуқни муҳофаза қилувчи бошқа идоралар вакиллари ҳамкорликда 120 та божхона қоидабузларликлари фош қилиниб, натижада қиймати 1,7 миллиард сўмдан ортиқ бўлган салкам 38,2 кг оғирликдаги тилла ва заргарлик буюмларининг ноқонуний олиб ўтилишига чек қўйилди.
Жумладан, Сеулдан учиб келган хатирчилик Д.Мирзаев (мақоладаги барча исм-шарифлар ўзгартирилган) холислар иштирокида шахсий кўрикдан ўтказилганда, 170 гр оғирликдаги, қиймати 8,9 миллион сўмлик тилла занжирни яширин равишда олиб киришга урингани аён бўлди.
Тошкентнинг Олмазор туманида истиқомат қилувчи С.Мусажонова Истанбулдан учиб келгач, тилладан ясалган 21 жуфт зирак ва 127 дона турли тақинчоқларни қўл юклари ва эгнидаги кийимлари орасига яширганча пойтахт аэропортидан олиб чиқишга уринди. Аммо божхоначилар томонидан унинг қинғир қилмишларига ўз вақтида чек қўйилди. Натижада, қиймати 91 миллион сўмдан ортиқ бўлган 509 гр оғирликдаги заргарлик буюмлари ашёвий далил сифатида олиб қўйилди.
Шунингдек, «Тошкент-Аэро» ИБК божхоначилари тилла ва заргарлик буюмларининг ноқонуний равишда олиб чиқиб кетилишига оид бир қатор божхона қоидабузарликларини ҳам фош қилди.
Жумладан, Тошкент—Ростов рейси бўйича парвозга отланган хорижий давлат фуқароси Ч.Мансуров оғирлиги 295 граммдан ортиқ салкам 50 миллион сўмлик тилла тақинчоқларни яширин равишда олиб чиқишга уринган пайтда тўхтатиб қолинди.
Шунингдек, пойтахтлик Х.Салимовага ҳам йўловчи божхона декларациясида ва божхона ходимининг оғзаки сўрови пайтида маълум қилмасдан туриб, қиймати 19 миллион сўмдан ортиқ бўлган 323 гр оғирликдаги тилла тақинчоқларни ички кийимлари орасига яширганча Деҳлига парвоз қилиш насиб қилмади.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Эслатиб ўтамиз, Ўзбекистон Республикаси ҳудудига жисмоний шахслар томонидан товарларни акциз солиғи солинмасдан олиб киришнинг чекланган меъёрларига (Адлия вазирлигида 1998 йил 13 мартда 412-сон билан рўйхатдан ўтказилган) асосан акциз солиғи солинмасдан олиб кириш учун умумий оғирлиги 30 граммдан ошмайдиган қимматбаҳо металл ва қимматбаҳо тошлардан ясалган бештагача заргарлик буюмларига рухсат берилади. Ўрнатилган мазкур меъёрдан ортиқчасини олиб киришда эса жисмоний шахслар тегишли божхона тўловларини тўлаши талаб этилади.
