Халқаро ногиронлар кунини нишонлашга бағишланган фестиваль 2015 йилнинг 2 декабрь куни Radisson Blu меҳмонхонасида бўлиб ўтди. Бу ҳақда Ўзбекистон Республикасининг Меҳнат ва аҳолини ижтимоий муҳофаза қилиш вазирлиги ахборот хизмати «Дарё»га маълум қилди.
Мазкур фестиваль ногиронлар дуч келаётган муаммолар ва барча инсонларнинг тенг ҳуқуқлигини таъминлаш масалаларига жамоатчилик эътиборини жалб этишга қаратилган бир қатор чора-тадбирлардан бири бўлиб ҳисобланади.
Умумжаҳон соғлиқни сақлаш ташкилотининг статистик маълумотларига кўра, дунё аҳолисининг 15 фоизини ногиронлар ташкил этиб, мазкур аҳоли гуруҳи дунёнинг энг «катта озчилиги» бўлиб ҳисобланади. Мазкур кўрсаткич йилдан йилга аҳоли сонининг ошиши, тиббиёт соҳасидаги ютуқлар ҳамда аҳолининг ҳаёт давомийлиги юксалиши оқибатида ўсиб бормоқда.
Очиқ ва тенг ҳуқуқлилик асосида ривожланаётган жамият қуриш заруриятига жамоатчилик эътиборини қаратишнинг йўлларидан бири Халқаро ногиронлар кунини ўтказишдан иборатдир. Мазкур кун 1992 йил БМТнинг Бош Ассамблеяси томонидан тасдиқланиб, ҳозирда ҳар йили бутун дунё бўйлаб 3 декабрь кунида нишонланади.
Жорий йил Ўзбекистонда бўлиб ўтадиган фестиваль доирасида ногиронлар иштирокидаги концерт дастури ва фотокўргазма бўлиб ўтиши режалаштирилган.
Мазкур санани нишонлаш доирасида Ўзбекистон Республикасида мустақиллик йилларида ногиронларни ижтимоий муҳофаза қилиш соҳасида амалга оширилган ишлар ва ютуқларга бағишланган бир қатор видеороликларнинг миллий телерадиокомпания орқали намойиш этилишини назарда тутувчи кенг кўламли медиа тадбир ҳам режалаштирилган.
Барча тадбирлар БМТнинг Ўзбекистондаги ваколатхонаси, Ўзбекистон Республикасининг Меҳнат ва аҳолини ижтимоий муҳофаза қилиш вазирлиги ва Ўзбекистоннинг Нодавлат-нотижорат ташкилотлари (ННТ) уюшмаси қошидаги Ногиронлар ННТларининг маслаҳатлашув кенгаши тономидан ташкил этилади.
Изоҳ (0)