Жиззах шаҳрида 30 мингга яқин истеъмолчи табиий газдан фойдаланади, дея хабар бермоқда ЎзА. Бу арзон ва қулай ёқилғи «Марказгазтаъминот» унитар корхонасининг «Жиззахшаҳаргаз» филиали томонидан истеъмолчиларга 43,7 километр юқори босимли, 190 километр ўрта ва 243,5 километр паст босимли узатиш қувурлари орқали етказиб берилмоқда.
Шаҳар ҳокимлигининг 2015—2016 йил қиш мавсумига тайёргарлик кўриш бўйича ишлаб чиқилган дастурига мувофиқ, газ узатиш тармоқларини реконструкция қилиш, мукаммал ва жорий таъмирлаш, газ асбобларини техник ва профлактик кўрикдан ўтказиш ишлари ниҳоясига етказилди. 8,2 километр газ узатиш қувури реконструкция қилинди, 20 километри босим остида техник синовдан, 16 километри махсус асбоблар орқали текширувдан ўтказилди.
– Қиш мавсумида табиий газнинг меъёрда ва узлуксиз бўлиши узатиш тармоқларининг бенуқсон ишлашига боғлиқлиги ҳисобга олиниб, реконструкция, таъмирлаш, профлактик кўрикдан ўтказиш ишлари тўлиқ ва сифатли бажарилди, – дейди «Жиззахшаҳаргаз» филиали раҳбари Рустам Аҳмаджонов. – Қиш даврида газ тармоғидаги носозлик ва таъминотдаги узилишларни тезкорлик билан бартараф этиш учун филиалнинг авария диспетчерлик хизмати шай ҳолатга келтирилди. Авария хизмати махсус жиҳозланган Damas автомашинаси, узлуксиз ишлайдиган телефон алоқаси билан таъминланди.
Мавсумга ҳозирлик кўришда ижтимоий муассасаларга газ узатувчи тармоқларни созлаш, камчиликларни бартараф этишга алоҳида эътибор қаратилди.
Изоҳ (0)