Федерал автомобиль йўлларидан фойдаланганлик учун тўловларга норозилик акциясида иштирок этиш учун Москвага йўл олган узоқ масофага қатновчи доғистонлик ҳайдовчилар йўл ҳаракати хавфсизлиги постларида тўхтатилмоқда. Уларнинг айтишича, 28 ноябрь, шанба куни бир неча минтақаларда полициячилар сабабини тушунтирмай, бўш кетаётган машиналарни тўхтатиб, ҳужжат талаб қила бошлаган, дея хабар беради «Газета.ru».
Тасдиқланмаган маълумотларга кўра, ҳайдовчилардан норозилик акцияларида иштирок этмасликлари тўғрисида тилхат ёзиб бериш сўралган, акс ҳолда маъмурий жавобгарликка тортиш билан пўписа қилинган. Узоқ масофага қатновчи ҳайдовчиларнинг норозилик акцияси 30 ноябрь куни Москвада бўлиб ўтиши, шу куни Россиянинг турли ҳудудларидан келган бўш юк автомобиллари Москва ҳалқа йўлини тўсиши режалаштирилган эди.
Акция ташкилотчиларининг Россия транспорт вазири Максим Соколов билан Санкт-Петербургдаги учрашуви натижасиз якунланди. Минглаб ҳайдовчилар федерал автомобиль йўлларидан фойдаланганлик учун жорий этилган тўлов тўлиқ бекор қилинишини талаб этмоқда.
Изоҳ (0)