Футбол бўйича Ўзбекистон миллий терма жамоаси Яманга қарши ЖЧ—2018 саралаш учрашувида ҳақли равишда ғалаба қозонди. Бу фикрни ўйиндан сўнг Яман термаси бош мураббийи Амин ас-Сунайний билдириб ўтди, дея хабар бермоқда ЎФФ матбуот хизмати.
ЖЧ—2018 саралаш «H» гуруҳи 8-тур учрашувлари доирасида 17 ноябрь, сешанба куни Қатар пойтахти Доҳада Яман меҳмони бўлган Ўзбекистон миллий терма жамоаси 3:1 ҳисобида ғалаба қозонди. Ўзбекистонга ғалаба келтирган голларга Азиз Ҳайдаров, Сервер Жепаров ва Станислав Андреев муаллифлик қилди.
«Биз ўйин қийин кечишини кутгандик. Жамоамиз сафида айрим футболчилар ўйнай олмаганидан азият чекдик. Уларнинг баъзилари жароҳати борлиги учун, қолганлари дисквалификация сабаб ўйинда иштирок эта олмади. Аммо буни асосий сабаб деб бўлмайди. Ўзбекистон терма жамоаси ғалабани ҳақли равишда қўлга киритди», — деди яманликлар устози.
«Эрта урилган биринчи гол ўйинга таъсир ўтказди. Бизда ҳам гол киритиш учун бир неча яхши вазиятлар бўлди, бироқ омадимиз бир марта келди. Иккинчи бўлимда яхши ўйнадик. Аммо таркибдаги йўқотишлар ўрнини зарур даражада тўлдира олмаганимиз сезилиб қолди», — дея қўшимча қилди Амин ас-Сунайний.
Изоҳ (0)