Россиялик саёҳатчи-блогер Александр Чебан Озарбайжон пойтахти Боку шаҳридаги Ҳайдар Алиев номли халқаро аэропорт ҳақида фоторепортаж тайёрлади.
Чебаннинг қайд этишича, Боку аэропортини бевосита Дубай ёки Сингапур ҳаво бандаргоҳлари билан таққослаб бўлмайди — Озарбайжон пойтахтида йўловчилар оқими ҳам, кўлам ҳам Дубай ёки Сингапурчалик катта эмас. «Бироқ бу ерда шундай муҳит яратилганки, рейсни кутиш — қулай бир машғулот, рейсдан тушиш эса ҳайратга солади», — дейди блогер.
Ташқи томондан Боку аэропорти аксарият замонавий аэропортлар руҳида қурилган — бетон, шиша ва металл каби юқори технологик материаллардан бунёд этилган бинонинг ғаройиб геометрик шакллардаги кўринишларидан футуризм уфуриб туради.
Аэропорт ичкарисида эса Туркиянинг Autoban меъморлик студияси Шарқ меҳмоннавозлигидан илҳом олиб, пилла кўринишидаги ёғоч элементлардан жонли ва ноодатий интерерни ишлаб чиққан.
Терминалнинг ўзи унчалик катта эмас — у йилига 6 миллион йўловчига хизмат кўрсатиш қувватига эга, майдони 65 минг квадрат метрни ташкил этади. Тўрт қаватли аэропортга кенг холл орқали кириб борилади.
«Бу кутиб олаётганлар учун ҳам, саёҳатга йўл олаётганлар учун ҳам бирдек шинам бўлган камдан-кам аэропортлардан биридир. Учиб кетиш ва кутиб олиш зонасига гилам тўшалган — бундай ҳолатни Сингапурда, Деҳлида, қисман Гонгконгда учратишингиз мумкин», — деб ёзади блогер.
Маълумот учун, The Guide to Sleeping in Airports («Аэропортларда ухлаш бўйича йўриқнома») интернет-ресурси танловига кўра, Бокудаги Ҳайдар Алиев номли аэропорт Осиёдаги энг яхши 25 ҳаво бандаргоҳидан бири ҳисобланади. Қайд этиш жоиз, мазкур интернет-ресурснинг «Жаҳон энг ёмон аэропортлари» рейтингида Тошкент халқаро аэропорти тўртинчи ўринда туради.
Изоҳ (0)