Қирғизистоннинг Талас вилояти Бакай-Ата туманида мактабни битирганига 10 йил бўлган синфдошлар, юбилей сана муносабати билан уюштириладиган зиёфат ўрнига, Оро қишлоғида етти болани тарбиялаётган ёлғиз онага тўрт хонали уй қуриб берди. Бу ҳақда «Турмуш» хабар бермоқда.
Хабар беришларича, бу тадбирга 20 нафар битирувчи қўшилган, айни вақтда хорижда истиқомат қилаётган синфдошлар эса чет элдан пул жўнатган. Қишлоқ аҳолиси ва синфдошларнинг саъй-ҳаракати билан, олти қиз ва бир ўғилни ёлғиз тарбиялаётган Гулбара Қурманалиева учун тўрт хонали уй бир йилда қуриб битказилган.
«Янги уй калитини топшириш маросимида Гулбара Қурманалиева миннатдорчилик билдирди. Битирувчиларнинг сўзларига кўра, уйни қуриш ва жиҳозлаш учун, қурилиш материалларидан ташқари қўшимча равишда 300 минг қирғиз сўми йўналтирилган», — дейилади «Турмуш» хабарида.
Изоҳ (0)