Тошкентда TAG Heuer RACER люкс смартфони 6 миллион сўмдан савдога чиқди

Тошкентда Швейцариянинг қимматбаҳо соатлар ишлаб чиқаришга ихтисослашган TAG Heuer компанияси томонидан тайёрланган TAG Heuer RACER (Full Carbon Orange) люкс смартфони савдога чиқарилди. «Mobinfo.uz»нинг қайд этишича, мазкур қурилма тақдимоти узоқ 2012 йилда бўлиб ўтган ва у Android 2.3 операцион тизимида ишлайди.

Full Carbon Orange версияси телефон олд панели тўлиқ карбон ва қора каучук билан қоплангани, қора PVD-қопламали зангламас пўлат корпусга оловранг пойга йўли туширилгани, қурилма қопқоғи эса карбон пластина ва PVD-қопламадан иборат эканлиги билан ажралиб туради.

TAG Heuer RACER смартфони 1 гигагерц частотали процессор негизида ишлайди, 3,5 дюймли дисплей, 5 мегапикселли камера, шунингдек, олд томонда VGA-камерага эга. Micro-SD карта учун слот мавжуд. Мусиқа тинглаш режимида 11 соатгача ишлай олади.

Тошкентдаги «Флешка» («Малика») бозорида TAG Heuer RACER (Classic версияси) смартфони рекорд даражадаги нарх — 6 миллион сўмга таклиф қилинмоқда.