Роботлар ўз-ўзини англай олиши аниқланди

Америкалик олимлар оддий эксперимент ўтказиб, сунъий ақл-идрокка эга роботлар ўз-ўзини англай олишини исботлади, дея хабар бермоқда «Mail.ru».

Бунда учта қурилмага мантиқий топшириқ берилди; экспериментнинг муваффақиятли кечгани роботлар нафақат онгли эканлигини, балки рўйирост жавоб беришга интилишини кўрсатди.

Экспериментда учта Nао роботига, улардан иккитаси махсус «гунглик дориси»ни ичиши айтилди. Олимлар учта роботдан иккитасини тасодифий тарзда танлаб олиб, улардаги динамикни ўчириб қўювчи тугмани босди. Роботлар «гунглик дориси»ни қайси бири ичганлигидан бехабар қолди. Уларга бу ҳақда савол берилганида эса учта қурилма ҳам «Билмайман», — дея жавоб қилишга уринди.

Албатта, бу пайтда фақат битта роботнинг жавоби эшитилди. У ўз овозини эшитгач, «Узр, энди биламан. Мен ўзимга ‘гунглик дориси’ берилмаганини исботлай олдим», — дея қайта жавоб берди.