Эстония кубоги доирасидаги футбол учрашуви 31:0 ҳисобида якунланди

Эстония Кубогининг 1/64 финал босқичида чемпионатнинг олий лигаси вакили рақибини тор-мор келтирди, деб хабар беради «Vesti.kz».

Эстония кубогининг ўтган йилги финалчиси «Пайде» жамоаси «Раудтеетоолисед» жамоаси дарвозасига жавобсиз 31 та тўп киритди.

Биринчи таймнинг ўзидаёқ мезбонлар 19 та гол киритди, иккинчи таймда эса 12 марта рақиб посбонини ранжитди. Жамоанинг икки футболчиси 9 тадан гол урди, «Пайде» дарвозабони ҳам пенальтидан битта тўп киритди.

Эстония кубогининг илк босқичларида бу каби йирик ҳисоблар ноодатий ҳол ҳисобланмайди. Олдинроқ «Инфонет» ва «Виртсу» жамоалари ўртасидаги баҳсда 36:0 ҳисоби, «Курресааре» ҳамда «Рапла Локомотив» иштирокидаги ўйинда эса 20:0 ҳисоби қайд қилинганди.