Ўтган куннинг энг оммабоп хабарлари билан танишинг

Алишер Усмоновнинг турмуш ўртоғи отасининг Тошкентдаги кўргазмаси очилишида иштирок этди

Ўзбекистон Бадиий академияси Камолиддин Беҳзод номидаги мемориал-боғ музейида ташкил этилган Александр Винер ижодига бағишланган кўргазма очилишида мусаввирнинг қизи, россиялик миллиардернинг турмуш ўртоғи Ирина Винер-Усмонова иштирок этди.

Ўзбекистонда ажрашиш ҳолатларининг 22 фоизи ўзаро муҳаббат йўқлигидан келиб чиқиши маълум бўлди

Аксарият ажрашганлар 20—25 ёш атрофидаги йигит-қизлар. Энг ачинарлиси, улар бир-бир ярим йил турмуш қурган, холос. Таҳлиллар шуни кўрсатадики, ажрашиш ҳолатларининг 18 фоизи оиладаги келишмовчиликлар, 22 фоизи ўзаро муҳаббатнинг йўқлиги, феъл-атворларнинг тўғри келмаслиги, қолганлари эса фарзандсизлик, эр ёки хотиннинг касаллиги, йигитларнинг ичкиликбозликка берилиб кетиши оқибатида келиб чиққан.

БМТ бош котиби Ўзбекистонга ташриф буюради

БМТ бош котиби Пан Ги Мун 9—11 июнь кунлари Душанбеда бўлиб ўтадиган «Сув ҳаёт учун» ҳаракатининг Халқаро ўн йиллиги якунларига бағишланган юқори даражадаги халқаро анжуманда иштирок этади. 12 июнь куни эса БМТ бош котиби Ўзбекистонга ташриф буюради. Сафар давомида қатор учрашувлар ўтказилиши режалаштирилган.

Марказий банк Ўзбекистонда валюта операциялари тўхтатилгани ҳақидаги хабарни рад этди

Банк матбуот хизмати эълон қилган расмий баёнотда айтилишича, Ўзбекистон Республикаси қонунчилигига мувофиқ, жорий халқаро операциялар ва улар билан боғлиқ хорижий валютани сотиш ёки сотиб олиш жараёни чеклашларсиз амалга оширилмоқда. «Айни пайтда расмий айирбошлаш курси Россия телеканалида айтилганидек 1 доллар учун 5000 сўм эмас, 2527 сўмни ташкил этади», — дея таъкидланади хабарда.

Зарафшонлик тадбиркор 9 млрд сўмдан зиёд товарлар сотувидан тушган нақд пулни кассага эмас, киссага урди

Зарафшон шаҳрида МЧЖлардан бирининг раҳбари шу лавозимда 2012—2013 йиллар ва 2014 йилнинг 9 ойи мобайнида фаолият юритган. Аниқланишича, у тегишли норматив-ҳуқуқий ҳужжатлар талабларига зид равишда 9 миллиард 185 миллион 503 минг сўмлик харидоргир ва тез сотилувчи товарларни нақд пулга сотиб, савдодан тушган нақд пул маблағларини назорат-касса машинасидан ўтказмай ҳамда банк муассасига топширмай, бошқа мақсадларда ишлатиб юборган.