Рақамли технологиялар вазири Шерзод Шерматов “Афросиёб” поездларида йўловчилар учун Wi-Fi хизмати ишга туширилганини маълум қилди.
Шерзод Шерматов Бухорога поездда бориб-келишда мазкур хизматдан фойдаланган ҳолда фойдали видеолар томоша қилиб кетган.
“Яқинда Бухорога поездда бориб-келишда эътибор қилсам, ҳали ҳам кўпчиликни Узтелеcом Wi-Fi хизматларини ишга туширганидан хабари йўқ экан. Шахсан текшириб келиш ниятида YouTube’да фойдали китобларни яхши тушунтириб берган видеоларни кўриб келдим. Сизга ҳам сафарларда шу каби фойдали каналларни кўриб кетишни тавсия қиламан, китоб ёнингизда бўлмаганида, ўша китоблардаги фойдали қисмларини содда видеолар орқали ўрганиб, ўзингизни ривожлантириб бораверасиз.”
Вазир Шавкат Мирзиёев доимо ўқиш ва илм олиш масаласига алоҳида эътибор қаратишини таъкидлаб, поезддаги сафарда ҳам бемалол фойдали билимларни ўрганиш мумкинлигини таъкидлаган.
“Президентимиз доим ўқиш, илм ўрганиш ҳақида таъкидлаб борадилар, ҳатто кечаги Спорт обектларига ташриф давомида ҳам жуда кўп айнан ўқишга ва илмга эътибор қаратдилар. Кўпчилик иш кўп, ўрганишга вақт топиш қийин деб баҳона қилишга ўтади, энди эса поезддаги сафарда ҳам бемалол фойдали билимларни ўрганиб борса бўлади.”
Шунингдек, Шерзод Шерматов поездлар ичига қўшимча ускуна қўйишга тегишли рухсатларни олишга ёрдам бергани учун Транспорт вазирлигига миннатдорлик билдирган.
“Транспорт вазирлигига поездлар ичига қўшимча ускуна қўйишга тегишли рухсатларни олишга ёрдам берганлари учун миннатдорчилик билдирамиз ва келгусида харид қилинадиган янги поездлар бошидан ичидаги тегишли телекоммуникация ускуналари билан олинади деб умид қиламиз. Тез ҳаракатланадиган ва метал кўп ишлатилган вагонларда ташқаридаги алоқа сигналлари абонентларга етиб боришида муаммо бўлади, шунинг учун уларнинг ичида тегишли қурилма ўрнатилиши шарт”, дейди вазир.
“Афросиёб” поезди рельсига бетон ташлаб, қўпорувчилик қилган темирйўлчилар узоқ муддатга қамалгани хабар қилинганди. Жиноят ишлари бўйича Навбаҳор туман суди томонидан эса қонунбузарлар қўпорувчилик ҳаракатини содир этганликда айбдор деб топилиб, уларнинг бирига 13 йил, иккинчисига эса 12 йил муддатга озодликдан маҳрум қилиш жазоси тайинланди.
Ўз навбатида қўпорувчилик ҳаракати натижасида жиноятчилар томонидан “Афросиёб” поездига 260 миллион сўм миқдорида зарар етказилгани аниқланган. Пуллар давлат ҳисобига ундирилган.
Изоҳ (0)