“Скибиди”, “делулу”: Кембриж луғатига TikTok’да машҳур бўлган ўсмирлар сўзлари қўшилди

Кембриж луғатига ижтимоий тармоқларда оммалашган 6000 та янги сўз киритилди. Улар орасида TikTok’да машҳур бўлган ўсмирлар сўзлари ҳам бор. Бу ҳақда The Guardian хабар берди

Луғатда технологиялар ва масофадан ишлашга оид бошқа атамалар ҳам киритилган. Бироқ машҳур сленгларнинг ҳам киритилиши кўпчиликнинг эътиборини тортди.

Интернет маданияти инглиз тилини ўзгартирмоқда, буни кузатиш ва луғатда қайд этиш жуда қизиқарли, деди Кембриж луғатининг лексик дастур менежери Колин Макинтош.

Скибиди — луғатда “турли маъноларда қўлланиши мумкин бўлган сўз” деб таърифланади. Масалан, “зўр” ёки “ёмон” деган маънода. Бундан ташқари у умуман маъносиз, ҳазил тариқасида ишлатилиши мумкин. Мисол: “What the skibidi are you doing?” (“Қанақа скибиди қилиб юрибсан?” — яъни “Нима бало қилиб юрибсан?”га ўхшаш).

Ҳатто машҳур юлдуз Ким Кардашьян ҳам бу тренддан четда қолмаган: у Instagram’да “skibidi toilet” ёзуви ўйиб ёзилган маржон таққан видеосини жойлаган. Скибиди аслида YouTube’даги машҳур анимацион мултик номи орқали машҳур бўлган. Унда одам бошли унитаз кўринишидаги мавжудотлар тасвирланган. Сериални Россиядан Грузияга кўчиб ўтган 3D аниматор Алексей Герасимов яратган.

Тradewife — “tarditional wifе” (анъанавий хотин) сўзининг қисқартмаси бўлиб, у “анъанавий” турмуш тарзини юритадиган — болаларни тарбиялайдиган, овқат тайёрлайдиган, уй-рўзғор ишларини бажарадиган ва шу билан бирга ижтимоий тармоқларда фаол бўлган аёлни англатади.

Delulu — “delusioanal” (“хомхаёл, ўзини алдаган”) сўзининг қисқартирилган шакли. “Ўзи хоҳлаб ҳақиқатга тўғри келмайдиган нарсага ишониш” маъносини беради.

Пандемия даврида масофавий ишлашнинг оммалашуви билан луғатга mousejiggler (компьютер сичқончасини қимирлатиб турувчи) атамаси киритилди. Бу компьютерда ишлаётгандек кўрсатиб, ҳамкасбларингизнинг ортиқча эътиборини тортмасдан ўз ишларингиз билан шуғулланишингизга имкон берадиган қурилма ёки дастур.

Луғатда broligarchy каби баъзи қўшма атамалар ҳам пайдо бўлди. Бу сўз “brо” (биродар, дўст) ва “оligarchy” (олигархия) сўзларидан ясалган. Бу сўз технология бизнесида улкан бойлик ва таъсир кучига эга бўлган кичик эркаклар гуруҳини ифодалайди. Улар сиёсатга ҳам таъсир ўтказади ёки унга интилади. Масалан, миллиардерлардан Жефф Безос, Илон Маск ва Марк Цукерберг ҳам президент Дональд Трамп инаугурациясида қатнашганида, уларга нисбатан “бролигарчй” сўзи ишлатилган. Кембриж луғати вакиллари бу атамалар кундалик қўлланилишига ишонмоқда.