O‘tgan kunning eng ommabop xabarlari bilan tanishing

Alisher Usmonovning turmush o‘rtog‘i otasining Toshkentdagi ko‘rgazmasi ochilishida ishtirok etdi

O‘zbekiston Badiiy akademiyasi Kamoliddin Behzod nomidagi memorial-bog‘ muzeyida tashkil etilgan Aleksandr Viner ijodiga bag‘ishlangan ko‘rgazma ochilishida musavvirning qizi, rossiyalik milliarderning turmush o‘rtog‘i Irina Viner-Usmonova ishtirok etdi.

O‘zbekistonda ajrashish holatlarining 22 foizi o‘zaro muhabbat yo‘qligidan kelib chiqishi ma’lum bo‘ldi

Aksariyat ajrashganlar 20—25 yosh atrofidagi yigit-qizlar. Eng achinarlisi, ular bir-bir yarim yil turmush qurgan, xolos. Tahlillar shuni ko‘rsatadiki, ajrashish holatlarining 18 foizi oiladagi kelishmovchiliklar, 22 foizi o‘zaro muhabbatning yo‘qligi, fe’l-atvorlarning to‘g‘ri kelmasligi, qolganlari esa farzandsizlik, er yoki xotinning kasalligi, yigitlarning ichkilikbozlikka berilib ketishi oqibatida kelib chiqqan.

BMT bosh kotibi O‘zbekistonga tashrif buyuradi

BMT bosh kotibi Pan Gi Mun 9—11-iyun kunlari Dushanbeda bo‘lib o‘tadigan “Suv hayot uchun” harakatining Xalqaro o‘nyilligi yakunlariga bag‘ishlangan yuqori darajadagi xalqaro anjumanda ishtirok etadi. 12-iyun kuni esa BMT bosh kotibi O‘zbekistonga tashrif buyuradi. Safar davomida qator uchrashuvlar o‘tkazilishi rejalashtirilgan.

Markaziy bank O‘zbekistonda valyuta operatsiyalari to‘xtatilgani haqidagi xabarni rad etdi

Bank matbuot xizmati e’lon qilgan rasmiy bayonotda aytilishicha, O‘zbekiston Respublikasi qonunchiligiga muvofiq, joriy xalqaro operatsiyalar va ular bilan bog‘liq xorijiy valyutani sotish yoki sotib olish jarayoni cheklashlarsiz amalga oshirilmoqda. “Ayni paytda rasmiy ayirboshlash kursi Rossiya telekanalida aytilganidek 1 dollar uchun 5000 so‘m emas, 2527 so‘mni tashkil etadi”, — deya ta’kidlanadi xabarda.

Zarafshonlik tadbirkor 9 mlrd so‘mdan ziyod tovarlar sotuvidan tushgan naqd pulni kassaga emas, kissaga urdi

Zarafshon shahrida MChJlardan birining rahbari shu lavozimda 2012—2013-yillar va 2014-yilning 9 oyi mobaynida faoliyat yuritgan. Aniqlanishicha, u tegishli normativ-huquqiy hujjatlar talablariga zid ravishda 9 milliard 185 million 503 ming so‘mlik xaridorgir va tez sotiluvchi tovarlarni naqd pulga sotib, savdodan tushgan naqd pul mablag‘larini nazorat-kassa mashinasidan o‘tkazmay hamda bank muassasiga topshirmay, boshqa maqsadlarda ishlatib yuborgan.