Англия Премьер Лигасининг 1-туридан ўрин олган “Ливерпуль” – “Борнмут” (4:2) учрашуви чоғида нохуш ҳолат юз берди. BBC хабарига кўра, ногиронлар аравачасидаги “Ливерпуль” мухлиси меҳмон жамоа ҳужумчиси Антуан Семенёга ирқчилик асосидаги ҳақоратлар қилгани учун Буюк Британиядаги барча стадионларга кириш ҳуқуқидан маҳрум этилди.
Маълум қилинишича, унга нафақат стадионларга кириш тақиқлангани, балки футбол ареналарига 1 милдан (1,6 км) яқинлашиш ҳам ман этилган.
Воқеа ўйиннинг биринчи бўлимида содир бўлган. “Борнмут” ҳужумчиси Семенё ҳакамга мурожаат қилиб, ногирон мухлис томонидан ирқий камситилишга учраганини билдирган. Бу ҳолатдан сўнг 47 ёшли эркак стадиондан чиқариб юборилган ва кейинчалик “жамоат тартибини бузиш” ҳамда “оғирлаштирувчи ҳолатлар билан” айбланиб ҳибсга олинган. Полиция маълумотига кўра, у кафолат асосида қўйиб юборилган, бироқ тергов ҳаракатлари давом этмоқда.
Антуан Семенё эса ўйиндан сўнг ижтимоий тармоқларда жамоадошлари, “Ливерпуль” футболчилари ва футбол жамоатчилигига кўрсатган бирдамлик ва қўллаб-қувватлов учун миннатдорлик билдирди.
Маълумот учун, мазкур баҳсда “Ливерпуль” 4:2 ҳисобида зафар қучди. Семенё эса “Борнмут”нинг ҳар икки голига муаллифлик қилиб, ўйиннинг энг фаол футболчиларидан бирига айланди.
Изоҳ (0)