Қозоғистон бош вазири ўринбосари Қанат Бозумбаев давлатлараро мувофиқлаштирувчи сув хўжалиги комиссияси йиғилишида Марказий Осиёда сув ресурсларини адолатли тақсимлаш зарурлигини таъкидлади.
Давлатлараро мувофиқлаштирувчи сув хўжалиги комиссияси трансчегаравий сув ресурсларини стратегик бошқариш бўйича минтақанинг асосий органи ҳисобланади. Навбатдаги йиғилиш мураккаб агроиқлимий шароит туфайли сувни адолатли тақсимлаш масалаларига қаратилди.
“Бу шунчаки рақамлар эмас, балки қуйи оқимдаги сув таъминоти учун ҳақиқий хавфдир. Афсуски, комиссия доирасида қабул қилинган қарорлар тўлиқ бажарилмаяпти”, деди Бозумбаев.
У минтақа давлатлари фақат баёнотлар билан чекланиб қолмасдан, амалий ҳаракатларга ўтиши ҳамда сувдан фойдаланишда ҳамкорликни ўзаро ишонч асосида ривожлантириш зарурлигини айтди.
“Биргаликдаги саъй-ҳаракатлар мамлакатларимиз ва бутун минтақа учун сезиларли натижалар беради”, дея қўшимча қилди Қозоғистон бош вазири ўринбосари.
Маълумот учун, Қирғизистон ва Ўзбекистон жанубдаги суғориш тақчиллигини бартараф этиш учун Қозоғистонга 600 миллион куб метр сув юбориши режалаштирилган. Бозумбаевнинг айтишича, бу борада Қирғизистон ва Ўзбекистон вакиллари билан зарур музокаралар ўтказилган. Қозоғистонга сув етказиб бериш жадвалида бир миллиард куб метрдан ортиқ орқада қолиш ҳолати ҳам қайд этилган.
Бозумбаевнинг сўзларига кўра, бутун Марказий Осиёда бу йил қурғоқчил келди. Туркистон ва Қизилўрда вилоятларини сув билан таъминловчи Сирдарёнинг асосий ўзанига одатдагидан 30–40 фоиз кам сув келмоқда. Аномал иссиқлик туфайли деҳқончилик эҳтиёжлари ортган, аммо мавжуд сув ҳажми етарли эмас.
Изоҳ (0)