Disney Голливудда энг кўп фойда олган киностудия деб топилди

Disney Forbes журнали томонидан Голливуднинг энг кўп фойда оладиган киностудияси деб топилди. Бу ҳақда «РБК» хабар бермоқда.

Студиянинг 2014 йилдаги айланма маблағи 7,2 миллиард долларни, фойдаси эса 1,7 миллиард долларни ташкил этди. Disney томонидан суратга олинган «Малефисента» фильмининг ўзи бутун жаҳон бўйлаб 758 миллион доллар йиғди.

«Форсаж 7»ни суратга олган NBC Universal киностудияси ўтган йили 5 миллиард даромад қилди ва шундан 711 миллион доллар соф фойдани ташкил этди.

Аммо энг кўп фойда олиш бўйича иккинчи ўринни Century Fox эгаллади. «Йўқолган аёл», «Юлдузлар айбдор», «Маймунлар сайёраси: Инқилоб», «Икс одамлар» ва «Рио 2» каби блокбастерларни суратга олган компания 2014 йилда 10,3 миллиард даромад ва 1,5 миллиард соф фойда қилди.

Рейтингдаги кейинги ўринларни Warner Bros. (фойда — 1,2 миллиард доллар, даромад — 12,5 миллиард доллар), Sony (фойда — 540 миллион доллар, даромад — 6,9 миллиард доллар) ва Paramount (фойда — 219 миллион доллар, даромад — 3,7 миллиард доллар) эгаллади.