Россиянинг «Муз-ТВ» канали бош директори Шаҳзодани «Премия Муз-ТВ 2015» гала-концертида қатнашиш учун таклиф қилди

Эстрадамизнинг ёрқин юлдузи Шаҳзоданинг 15 йиллик ижодий концерт дастури 7 кун давом этди, деб ёзади «Popcorn.uz».

Шаҳзоданинг юбилей шоу концерт дастурини томоша қилиш учун Россиянинг «Муз-ТВ» телеканали бош директори Арман Давлетьяров ташриф буюриб хонандани ютуқлари билан қутлади.

«Концертни бир нафасда томоша қилдим. Тўғриси нимагадир чалғишга, зерикишга умуман имкон бўлмади. Чунки таъсирланишим, ҳайратланишим, бир олам шодлик олишим учун сабаблар кўп эди. Авваламбор, саҳна кўринишлари, декорация, замонавий ёритиш ускуналари, ҳар бир қўшиқ декорациянинг ўзгариши билан уйғунлашиши, замонавий технологиялар ва жаҳон стандартига жавоб берадиган техникалардан унумли фойдаланилган. Шаҳзода учун танланган либослар, саҳналаштирилган рақслар бир сўз билан айтганда томошабинга замон билан ҳамнафас ҳақиқий шоу тақдим этди. Концертни томоша қилиб бир олам завқ олдим», — деди Давлетьяров.

У мамнуният билан Шаҳзодани 4 июнда Остона шаҳрида бўлиб ўтадиган Pre-party «Премия Муз-ТВ 2015. Гравитация» Open Air гала-концертида иштирок этиш учун таклиф этди. «Қизил йўлакларда бошқа юлдузлар қаторида севимли хонандамиз Шаҳзодани кўриш биз учун шараф. Бугунги чиройли шоу учун эса севимли хонандамизга миннатдорчилигимни билдириб қоламан», — деди у.