Рига мери шаҳар кенгаши мушугини давлат тили тўғрисидаги қонунни бузишда гумон қилди

Латвия пойтахти Рига шаҳри мери Нил Ушаков шаҳар думасидаги мушуклардан бири – Кузя устидан Латвия Давлат тили марказига шикоят қилишини маълум қилди. Бу ҳақида Meduza.io хабар бермоқда.

Мерия ходимларининг фикрича, ола-була жонивор маъмурият меҳмонлари ва иккинчи мушук – Мурис билан латиш тилида мулоқот қилмаяпти.

Ушаковнинг бу баёноти Давлат тили маркази мернинг 9 майга бағишланган чиқишини текшириш ҳақидаги қарорига жавоб бўлди.

Хабар беришларича, шаҳар раҳбарининг байрамга йиғилганларга латиш тилига таржимасиз рус тилида гапиргани Латвия қонунчилигига зид бўлиши мумкин.

Агар Ушаков ушбу тадбирда жисмоний шахс эмас, балки шаҳар мери сифатида чиқиш қилган бўлса, у ҳолда ҳуқуқбузарлик содир этилган ҳисобланади.

Ушаковнинг баёнотида қайд этилишича, мушук Кузя шаҳар маъмуриятидан маош олмайди, шунинг учун ҳам у жисмоний шахс деб баҳоланиши мумкин.

«Ўйлайманки, Давлат тили маркази ушбу масалани ўрганиб чиқиши учун Бош прокуратура ва Адлия вазирлигини ҳам жалб этиши керак. Масала жуда муҳим ва биз бутун жамоамиз билан жавобни интиқлик билан кутмоқдамиз», - деди Нил Ушаков.