Жон Керри Сочида Россия президенти билан учрашиши ҳақида хабар берилди

АҚШ Давлат котиби Жон Керри 12 май куни Сочида Россия президенти Владимир Путин, ташқи ишлар вазири Сергей Лавров ва Россиянинг бошқа расмийлари билан учрашади. Бу ҳақда, RBC.ru’нинг маълум қилишича, АҚШ Давлат департаменти хабар берган.

«Жон Керри икки томонлама ва минтақавий долзарб, хусусан, Эрон, Сурия ва Украинага доир масалаларни муҳокама қилади. Ташриф Россиянинг юқори мартабали вакиллари билан бевосита алоқаларни сақлаб қолиш ва АҚШнинг ёндашувларини тушунтириш бўйича давом этаётган уринишларимизнинг бир қисмидир», - дейилади АҚШнинг Россиядаги элчихонаси хабарида.

Россия расмий манбалари эса Путиннинг Керри билан учрашиши ҳақидаги ахборотни ҳозирча тасдиқлаётгани йўқ. Хусусан, Россия президенти матбуот котиби Дмитрий Песков бу борада ҳали қарор қабул қилинмаганини айтди. «Агар шундай учрашув бўлса, биз бу ҳақда маълум қиламиз», - деди у.

Россия Ташқи ишлар вазирлиги Сочида Сергей Лавров ва Жон Керри ўртасида музокаралар бўлиб ўтиши, унда «икки томонлама муносабатларнинг жорий масалалари ва долзарб халқаро муаммолар юзасидан фикр алмашилиши»ни маълум қилганди.

«Давлат котиби Жон Керрининг ташрифи кўп жиҳатдан глобал барқарорликка асос бўлган икки томонлама муносабатларимизнинг нормаллашувига хизмат қилади, деб умид қиляпмиз», - дейилади ТИВ ахборотида.

Қайд этиш жоиз, бунгача Путин ва Керри ўртасидаги ягона учрашув 2013 йил 7 майида Кремлда бўлиб ўтганди.