Швеция олий суди WikiLeaks асосчиси Жулиан Ассанжни ҳибсга олиш ҳақидаги ордерни ўз кучида қолдирди. Бу ҳақда Meduza.io хабар бермоқда.
Ассанжнинг адвокатлари суд қароридан норози эканликларини, суд ҳимоя томонига ўз фикрларини билдириш учун имконият бермаганини маълум қилишди. Суднинг беш аъзосидан фақат бир нафари ҳамкасбларининг қарорига қўшилмади ва Ассанжни ҳибсга олишни бекор қилиш кераклигини таъкидлади.
Суд мажлислари давомида Швеция олий суди Ассанж ҳам судга келиши кераклигини талаб қилди, охир-оқибат 2012 йилдан Лондонда яшириниб юрган Ассанжга ўша ердан туриб кўрсатма беришга рухсат этди.
Австралия фуқароси ҳисобланган Жулиан Ассанж Швеция томонидан жинсий товламачилик жиноятини содир этганликда айбланмоқда. Суд Ассанжни 2011 йил декабрида сиртдан ҳибсга олган. WikiLeaks асосчиси 2012 йил июнидан бери Эквадорнинг Лондондаги элчихонаси ҳудудида яшириниб турибди.
Ассанжнинг ўзи унга нисбатан илгари сурилган айбловни тан олаётгани йўқ. Унинг сўзларига кўра, агар Швеция уни ҳибсга олса, дарҳол АҚШга топширади, АҚШ эса Ассанжни турли ҳукумат идоралари ва хизматларининг махфий ҳужжатларини омма эътиборига ҳавола қилиб юборгани учун таъқиб қилмоқда.
Изоҳ (0)