Хитой ҳукумати Жанубий Хитой денгизида жойлашган баҳсли Спратли ороллари ҳудудида ерларни тиклаш жараёнини тезлаштирди. Бу ҳақда, Kommersant.ru’нинг хабар беришича, АҚШ Мудофаа вазирлиги томонидан чиқарилган Хитойнинг ҳарбий ва хавфсизлик соҳаларидаги тараққиётига бағишланган йиллик ҳисоботда маълум қилинган.
«2014 йилда Хитой Спратли архипелаги ҳудудидаги ўзининг бешта мустаҳкам иншоотларида ерларни тиклаш бўйича катта ҳажмдаги ишларни амалга оширди. 2014 йил декабридаги ҳолатга кўра, Хитой ушбу ҳаракатлар самарасида 2 квадрат километр ер тиклади. Бу ишлар якунига етиши билан ушбу ҳудудда портлар, коммуникация ва кузатув тизимлари, моддий-техник база ва, ҳеч бўлмаганда, битта аэродром жойлашиши мумкин», - дейилади ҳужжатда.
Қайд этишларича, Жанубий Хитой денгизининг жануби-ғарбий қисмида жойлашган Спратли оролларига Вьетнам, Хитой, Тайвань, Малайзия, Филиппин ва Бруней даъвогарлик қилади. Архипелаг ҳам геосиёсий, ҳам иқтисодий жиҳатдан муҳим: тахминларга кўра, бу ерда катта нефть ва газ захираси мавжуд.
Минтақадаги вазият Хитой маржон қоялардан бирига асосланиб сунъий ороллар қуришга фаол киришганидан сўнг кескинлашди. Филиппин президенти Бенигно Акино III Хитойнинг айби билан минтақада кенг миқёсли ҳарбий низо келиб чиқиши мумкинлигидан огоҳлантирди. Айни вақтда, расмий Манила архипелагнинг бошқа бир қисмида объектларни «қайта тиклаш ва реконструкция қилиш бўйича ишлар» қайта бошланишини эълон қилди. Ушбу баҳсда АҚШ Филиппинни фаол қўллаб-қувватлади.
Изоҳ (0)