Япониянинг Токио шаҳридаги «Ajinamoto Stadium»да Япония ва Ўзбекистон терма жамоалари ўртасидаги ўйин ўз ниҳоясига етди. Унда майдон эгалари йирик 5:1 ҳисобда ғалаба қозонишди, деб хабар бермоқда «Uff.uz».
Дастлабки гол ўзини узоқ куттирмади. Аояма чамаси 35 метрлардан кучли зарба йўллаб, жуда чиройли гол муаллифига айланди. Голдан кейин футболчиларимиз бир оз ўзларига келгандек туюлиб, бирин-кетин ҳужумлар уюштиришди. Аммо япон ҳимоячилари бу ҳужумларни осонлик билан баратаф этишди.
Иккинчи бўлимда ҳақиқий голлар шоуси бошланиб кетди. Аввалига, Оказаки 54-дақиқада боши билан гол уриб, ҳисобни 2:0га етказди. Кейин Кавамата Сардор Рашидовнинг ноаниқ ҳаракатидан фойдаланиб, қарши ҳужумга ўтди ва деярли майдон марказидан Акбар Тўраевнинг устидан тўпни ошириб гол киритди. Мазкур голдан кейин вакилларимиз ҳам ҳужумни муваффақиятли якунлашга эришишди. Ислом Тўхтахўжаев гол муаллифи. Орадан кўп ўтмай Усами бир йўла уч нафар ҳимоячимизни алдаб ўтиб, Тўраевни ожиз қолдирди. Кейин захирадан майдонга тушган Кавамата гол киритиб, учрашувда якуний ҳисобни таъминлади.
Умид қиламизки, Миржалол Қосимов бошчилигидаги мураббийларимиз ушбу ўйиндан тегишли хулоса чиқариб, йўл қўйилган камчиликларни бартараф этиш устида ишлашади.
Япония – Ўзбекистон 5:1
Голлар: Аояма, 7, Оказаки, 54, Шибасаки, 79, Усами, 83, Кавамата, 88 – Ислом Тўхтахўжаев, 81
Япония: Кавашима, Учида, Морисиге, Шожи, Сакаи, Аояма, Конно, Инуи, Хонда, Кагава, Оказаки.
Ўзбекистон: Акбар Тўраев, Шуҳрат Муҳаммадиев, Анзур Исмоилов, Ислом Тўхтахўжаев, Александр Мерзляков, Азиз Ҳайдаров, Лутфулла Тўраев, Санжар Турсунов, Сардор Рашидов, Воҳид Шодиев, Баҳодир Насимов.
Изоҳ (0)