Ўзбекистон U-23 Бангладеш устидан йирик ғалабага эришди

Бангладешда давом этаётган Ёшлар ўртасидаги Осиё чемпионатига саралаш ўйинларидан ўрин олган Бангладеш ва Ўзбекистон ёшлар терма жамоалари ўртасидаги учрашув ўз ниҳоясига етди, дея хабар бермоқда «Uff.uz».

Унда Бахтиёр Ашурматов шогирдлари йирик ҳисобда ғалаба қозонишди. Шуни алоҳида таъкидлаш керакки, Ашурматов мазкур ўйинда аввалги Ҳиндистонга қарши учрашувдан фарқли равишда асосий таркибда бир қатор ўзгаришлар қилди. Жумладан, аввалги ўйинни бошидан бошлаган Владимир Козак, Жамшид Искандеров, Игорь Сергеев каби етакчилар захирада қолишди. Бош мураббий уларни ҳал қилувчи бўлган Сурияга қарши ўйинга сақлаб қўйди, деб тахмин қилиш мумкин. Ушбу ўйинда асосий таркибда тушган футболчилар ҳам ишончни тўлиқ оқлашди. 3-дақиқадаёқ Жалолиддин Машарипов аниқ зарба билан ҳисобни очди. Кейин 13 ва 29-дақиқаларда шу кун терма жамоани сардор сифатида майдонга бошлаб тушган Сардор Раҳмонов иккита гол киритиб, ҳисобни ишончли кўринишга олиб келди.

Орадан 10 дақиқа ўтиб Аббосбек Махсталиев Ўзбекистоннинг тўртинчи голини ҳам киритди. Иккинчи бўлимни ҳам вакилларимиз анча фаол бошлашди. Аммо 55-дақиқада ҳужумчимиз Алишер Шоғуломов керакмас жойда рақибга нисбатан қўполлик ишлатиб, майдондан четлатилди. 69-дақиқада бу борада майдонда вазият тенглашди. Бангладеш ёшлар терма жамоаси аъзоси Райён ҳам ҳакам томонидан майдондан четлатилди. Шу тариқа Ўзбекистон ёшлар терма жамоаси гуруҳдаги иккинчи ўйинда Бангладеш устидан йирик ҳисобда ғалаба қозониб, ўз очколари сонини 6 тага етказиб олди. Гуруҳда 1-ўринни ҳозирча Сурия терма жамоаси эгаллаб турибди. Улар фақатгина тўплар нисбатига кўра вакилларимиздан юқоридалар.

Бангладеш U23 - Ўзбекистон U23 — 0:4

Голлар: Ж.Машарипов (3), С.Раҳмонов (13, 29), А.Махсталиев, 39

Бангладеш U23: Литон, Топу, Райён, Ёсин Хон, Наҳид, Муҳаммад Атийқур, Жабал Рана, Гемонта Синвент, Сахел Рана, Шокир Аҳмад, Воҳид.

Ўзбекистон U23: Акмал Турсунбоев, Акромжон Комилов, Сардор Раҳмонов, Аббос Махсталиев, Ҳасан Асқаров, Жавлон Mирaбдуллаев, Жавоҳирбек Расулов, Сардор Собирхўжаев, Жалолиддин Машарипов, Темур Аюпов, Алишер Шоғуломов.