Ўзбекистон Миллий Олимпия қўмитасида Республика Rowing & Canoe федерациясининг навбатдан ташқари конференцияси ўтказилди. Унда Миллий олимпия қўмитаси мутасаддилари, Rowing & Canoe федерацияси раҳбарияти, терма жамоалар бош мураббийлари, вилоят федерацияларининг масъуллари иштирок этди, деб хабар бермоқда Ўзбекистон Миллий Олимпия қўмитасининг расмий сайти.
Йиғилишни федерация раҳбари Жасур Акрамов кириш сўзи билан очар экан, якунланиб бораётган 2014 йилда Давлат раҳбарининг «Ўзбекистон спортчиларини 2016 йил Рио-де-Жанейро шаҳри (Бразилия)да ўтказиладиган ХXXI ёзги Олимпиада ва XV Паралимпия ўйинларига муносиб тайёрлаш тўғрисида»ги қарори ҳамда Республика комиссиясининг йиғилишларида белгиланган вазифаларни юзасидан амалга оширилган ишлар, шунингдек, жорий мавсумда Ўзбекистон академик ҳамда байдарка ва каноэчилар томонидан эришилган ютуқлар, спортнинг ушбу турларини Ўзбекистонда янада оммалаштириш ва ривожлантириш борасида олиб борилган саъй-ҳаракатлар хусусида атрофлича тўхталиб ўтди.
Республика Rowing & Canoe федерацияси раҳбари, шунингдек, 2015 йилда «Рио—2016» олимпиада ўйинларининг йўлланмалари ўйналадиган жаҳон ва Осиё чемпионатларига терма жамоаларни муносиб тайёрлаш борасида ҳам амалга оширилиши лозим бўлган ишлар хусусида ўз фикрларини баён этди.
Республика Rowing & Canoe федерациясининг навбатдан ташқари конференциясида ташкилий масала ҳам кўриб чиқилди. Федерация раҳбари «Ўзбекэнерго» давлат акциядорлик компанияси вакили Хабибулла Шамсиевни федерация раисининг биринчи ўринбосари, Аброр Аҳмедовни раис ўринбосари, Ўзбекистонда хизмат кўрсатган мураббий Татьяна Маматкуловани эса Республика Rowing & Canoe федерацияси бош котиби лавозимларига тайинлашни таклиф қилди. Йиғилиш қатнашчилари юқорида номлари келтирилган ҳар уч номзодни бир овоздан сайлади.
Конференцияда Rowing & Canoe федерацияси ижроқўм (Т. Маматкулова, Р. Садиков, А. Пономарев, А. Зубарев, Ш. Ғаниев, В. Сергеев) ҳамда тафтиш комиссияси аъзолари (Г. Израилбекова, Т. Подерюгина, Д. Исраилова) ҳам овоз бериш орқали сайланди.
Йиғилиш сўнгида ҳудудларда фаолият юритаётган федерациялар масъуллари сўзга чиқиб, жойларда спортнинг ушбу турларини ривожлантириш борасида амалга оширилган ишлар хусусида ахборот берди.
Изоҳ (0)