Миржалол Қосимов шогирдлари билан дуранг ўйнаган Янги Зеландия клуби ЖЧ — 2014 чорак финалига чиқди

Янги Зеландиянинг «Окленд Сити» клуби Марокашнинг «Мағриб» жамоасини пенальтилар сериясида мағлуб этди ва клублар ўртасидаги 2014 йилги жаҳон чемпионати чорак финалига йўл олди, деб хабар бермоқда «Кун».

ФИФА расмий сайтидаги ахборотга кўра, мусобақа мезбони — Марокашнинг «Мағриб» ҳамда Океания минтақасининг энг кучли жамоаси — «Окленд Сити» ўртасидаги учрашув асосий ва қўшимча вақтларида ҳисоб очилмаган.

Пенальтилар сериясида эса «Окленд Сити» жамоаси 4:3 ҳисобида ғалаба қозонди. Мусобақа чорак финалида «Окленд» Африка чемпиони бўлган Жазоирнинг «Сетиф» жамоасига қарши тўп суради. Ўйин 13 декабрь, шанба куни бўлиб ўтади.

Қайд этиш жоиз, ЕЧЛ — 2013/2014 чемпиони Мадриднинг «Реал» футбол клуби ЖЧ — 2014даги иштирокини 16 декабрдан бошлайди. Мадридликлар шу куни ЖЧ — 2014 ярим финали доирасида «Крус Асуль» (Мексика/Шимолий Америка) — «Вестерн Сидней» (Австралия/Осиё) жуфтлиги ғолибига қарши тўп суради.

Маълумот учун, «Окленд Сити» футбол клуби ЖЧ — 2014га тайёргарлик доирасида БААда Миржалол Қосимов бошқарувидаги Ўзбекистон миллий терма жамоасига қарши майдонга тушган ва 0:0 ҳисобида дуранг ўйнаган эди.