Футбол бўйича Ўзбекистон миллий терма жамоаси ва Россиянинг «Краснодар» футбол клуби ярим ҳимоячиси Одил Аҳмедов яқин 2-3 ҳафта ичида сафга қайтади. Бу ҳақда у «Championat.asia»га берган интервьюсида маълум қилди, деб хабар бермоқда «Kun.uz».
«Саломатлигим жойида. 2-3 ҳафтадан сўнг майдонга қайтаман ва миллий терма жамоанинг бошқа футболчилари билан бирга Осиё Кубоги-2015га тайёргарликни бошлайман», – деди Аҳмедов.
Эслатиб ўтамиз, Одил Аҳмедов Россия чемпионати 14-тури доирасидаги «Краснодар» – ЦСКА учрашуви (2:1) 19-дақиқасида жароҳат олиб, майдонни тарк этган, кейинроқ эса унинг жароҳати тахмин қилинганичалик жиддий эмаслиги маълум бўлганди.
Ўзбекистонлик футболчининг қўшимча қилишича, миллий терма жамоага қўшилгунига қадар у «Краснодар» шифокорлари назорати остида қолади.
Маълумот учун, футбол бўйича Ўзбекистон миллий терма жамоаси 2015 йилнинг январь ойида Австралияда ташкил этиладиган Осиё Кубоги баҳсларида иштирок этади. Мусобақада Хитой, Шимолий Корея ва Саудия Арабистони термалари Қосимов шогирдларига рақиб бўлади.
Изоҳ (0)