Автопойгачи Михаэль Шумахернинг тиббий картасини ўғирлаганликда гумон қилиниб 5 август, сешанба куни Швейцарияда ҳибсга олинган киши эртаси куни турма камерасида ўзини осиб қўйди. Бу ҳақда Interfax хабар берди.
Ўз жонига қасд қилган шахс спортчини Франциядаги клиникадан Швейцариядаги реабилитация марказига олиб ўтиши керак бўлган Rega вертолёт компанияси ходими бўлган. У германиялик пойгачининг касаллик тарихи ҳақидаги ҳужжатларнинг ўғирланиши билан боғлиқ шов-шувли воқеада ягона гумондор бўлган.
Етти карра «Формула-1» чемпиони Михаэль Шумахер 2013 йил 29 декабрда Альп тоғларида чанғи учаётиб, бошидан жароҳат олган ва ярим йил давомида Греноблдаги шифохонада кома ҳолатида ётган эди. 2014 йил июнида комадан чиққач, у реабилитация марказига кўчирилди. Уни аввалига вертолётда элтмоқчи бўлишган, кейинроқ «Тез ёрдам» машинасидан фойдаланишга қарор қилишган эди.
Қоида бўйича, беморни ташиш ҳақида шартнома тузилишидан олдин вертолёт компаниясига тиббий ҳужжатлар тақдим этилади. Тахмин қилинишича, айнан шу пайтда Rega ходимларидан бири Шумахер касаллик тарихидан нусха кўчириб олган.
Бундан кўп ўтмай, Европа ОАВларига номаълум шахслар томонидан спортчининг тиббий картасини 50 минг еврога сотиб олиш ҳақида хатлар келиб туша бошлади. Франция полицияси мактуб юборилган IP-манзил Rega вертолёт компанияси офисига тегишли эканини аниқлади ва 5 август куни унинг ходимларидан бири бу ишга алоқадорликда гумон қилиниб қўлга олинди.
45 ёшли Шумахер айни пайтда Лозаннадаги тиббий марказда реабилитация курсларидан ўтмоқда. Рафиқаси Коринна пойгачининг аҳволи яхшиланиб бораётганини айтди.
Изоҳ (0)