Чагаев — Окендо жанги 6 июль куни «Россия 2» телеканалида эфирга узатилади

Россиянинг Грозний шаҳридаги «Аҳмат Арена» стадионида WBA йўналиши супероғир вазнида доимий чемпионлик камари учун Руслан Чагаев америкалик Фрес Окендога қарши рингга чиқади. Чагаев — Окендо жанги «Россия 2» телеканали томонидан трансляция қилинади. Ушбу жангни 6 июль, якшанба куни соат 23:45 дан бошлаб томоша қилиш имконияти мавжуд, деб ёзади «Olamsport».

Руслан ҳозиргача 35 жанг ўтказиб, уларнинг 32 тасида ғалаба қозонган. Йигирмата жангда нокаут билан зафар қучган. Иккита мағлубият ва битта дурангга эга.

Окендо эса 44 жангнинг 37 тасида рақибларидан устун келган (24 нокаут) ва етти маротаба мағлубиятга учраган.

Михаэль Тимм қўл остида Гамбургда шуғулланиб келаётган Чагаев фаолиятида украиналик Владимир Кличко ва россиялик Александр Поветкинга чемпионлик жангларида имкониятни бой берган.

Чагаев сўнгги бешта жангини ғалаба билан тамомлаган. Охирги бор ўтган йилнинг 5 октябрь санасида Москвада ўтган жангда сербиялик Ёво Пударни 12 раунд давом этган жангда очколар ҳисоби бўйича мағлубиятга учратган.

Окендо эса сўнгги учта жангида ғалаба қозонган, бироқ ундан аввалги икки тўқнашувда мағлубият аламини тотиб кўрган.