Rossiyaning Grozniy shahridagi “Ahmat Arena” stadionida WBA yo‘nalishi superog‘ir vaznida doimiy chempionlik kamari uchun Ruslan Chagayev amerikalik Fres Okendoga qarshi ringga chiqadi. Chagayev — Okendo jangi “Rossiya 2” telekanali tomonidan translyatsiya qilinadi. Ushbu jangni 6-iyul, yakshanba kuni soat 23:45 dan boshlab tomosha qilish imkoniyati mavjud, deb yozadi “Olamsport”.
Ruslan hozirgacha 35 jang o‘tkazib, ularning 32 tasida g‘alaba qozongan. Yigirmata jangda nokaut bilan zafar quchgan. Ikkita mag‘lubiyat va bitta durangga ega.
Okendo esa 44 jangning 37 tasida raqiblaridan ustun kelgan (24 nokaut) va yetti marotaba mag‘lubiyatga uchragan.
Mixael Timm qo‘l ostida Gamburgda shug‘ullanib kelayotgan Chagayev faoliyatida ukrainalik Vladimir Klichko va rossiyalik Aleksandr Povetkinga chempionlik janglarida imkoniyatni boy bergan.
Chagayev so‘nggi beshta jangini g‘alaba bilan tamomlagan. Oxirgi bor o‘tgan yilning 5-oktabr sanasida Moskvada o‘tgan jangda serbiyalik Yovo Pudarni 12 raund davom etgan jangda ochkolar hisobi bo‘yicha mag‘lubiyatga uchratgan.
Okendo esa so‘nggi uchta jangida g‘alaba qozongan, biroq undan avvalgi ikki to‘qnashuvda mag‘lubiyat alamini totib ko‘rgan.