“Qattiqqo‘l xonim”, “Juliya”, “Primadonna” va boshqa taniqli filmlar yulduzi Meril Strip va aktyor Martin Short turmush qurishga tayyorgarlik ko‘rishmoqda. Bu haqda New Idea nashriga juftlikka yaqin bo‘lgan insonlar xabar berdi.
Nashrda aytilishicha, Strip va Short Janubiy Kaliforniyada yopiq to‘y marosimi o‘tkazish uchun qulay joy izlamoqda. Juftlik bir nechta variantni, jumladan, Santa Barbara atrofidagi manzarali hududlar, ular tez-tez tashrif buyuradigan sharob tayyorlovchilar tumani yoki Montesito yaqinidagi Ritz-Carlton Bacara kurorti kabi hududlarni ko‘rib chiqmoqda:
Ritz-Carlton Bacara bo‘lajak to‘y uchun ajoyib joy, qolaversa, bu kurort to‘liq yopiq hududdan iborat. Bu jihat Martin va Meril uchun katta afzallik beradi, chunki ular ikkisi ham nikoh marosimi ommadan uzoq yerda bo‘lib o‘tishini istaydi. Fikrimizcha, bu marosim katta bayram tarzida bo‘lib o‘tadi, deyiladi manbada.
To‘yga kamida 50 nafar mehmon taklif qilinishi rejalashtirilgan. Ular orasida shou-biznes olami vakillari: Tom Henks, Rita Uilson, Stiv Martin, Selena Gomes, Sher, Viola Devis va boshqalar bor.
Foto: People
Meril Strip va Martin Short “Binodagi qotillik” serialining uchinchi mavsumida yaqindan tanishgan, ular filmda oshiqlar obrazini gavdalantirgan. Juftlik tez-tez paparatssi kadrlariga tushsa-da, ular munosabatlari haqida sukut saqlaydi va faqat do‘st ekanligini ta’kidlaydi.
Ma’lumot uchun, Meril Strip — amerikalik aktrisa, kino va teatr sohasi yulduzi. U 1949-yil 22-iyunda Nyu Jersi shtatining Sammits shahrida tug‘ilgan. Strip 1970-yillarda teatrda faoliyat boshlagan, keyinchalik kino sanoatiga o‘tgan. U ko‘plab muvaffaqiyatli filmlarda rol o‘ynagan va 3 karra “Oskar” mukofotini qo‘lga kiritgan. Shuningdek, aktrisa 8 ta “Oltin Globus” va boshqa ko‘plab yirik mukofotlar bilan taqdirlangan.
1978-yilda turmush qurgan Meril Strip va Don Gammerlarning munosabati uzoq yillar davomida Gollivudning eng namunali oilasi sifatida tan olingan edi. Ushbu oilada to‘rt farzand: Genri, Memi, Greys va Luiza dunyoga keldi. Ammo 2023-yil oktyabr oyida er-xotin olti yildan ortiq vaqt davomida alohida yashab kelgani ma’lum bo‘ldi. Shunga qaramay, aktrisa Strip ajrashgandan keyin ham sobiq turmush o‘rtog‘iga hurmat ko‘rsatib, nikoh uzugini taqishda davom etgan.
Izoh (0)