Top-10 talikda atigi ikki ayol: Gollivuddagi eng ko‘p maosh oluvchi aktyorlar gonorari ma’lum qilindi

Mart oyida “Oskar” taqdirlash marosimida har bir suratkash o‘tkazib yuborishni istamagan yagona yulduz, shubhasiz, Versace libosidagi Margo Robbi edi.

Avstraliyalik aktrisa 2023-yilda eng ko‘p daromad keltirgan “Barbi” filmida bosh rolni ijro etgan va filmga prodyuserlik qilgan. Biroq o‘tgan yilda eng katta miqdorda gonorar olgan yulduz u emas, balki Adam Sendler bo‘ldi. Ajablanarlisi, aktyor ishtirok etgan birorta film 2023-yilda mashhur bo‘lmagan va hatto top-10 talikka kirmagan.

“Asosiy instinkt” filmi yulduzi Sheron Stoun aktyorlarga beriladigan gonorarda ayol va erkaklar o‘rtasida keskin farq mavjudligi haqida avval ham ta’kidlab o‘tgan edi. Aktrisa bir xil rol uchun erkaklarga14 barobar ko‘proq maosh taklif etilishidan shikoyat qilgan.

Bugungi kunda eng ko‘p gonorar olgan Gollivud yulduzlari o‘ntaligiga atigi ikki nafar ayol kiritildi: bular Margo Robbi va Jennifer Eniston. “Barbi” yulduzi 59 million dollar ishlab topganini inobatga olsak, u Adam Sendler (73 million) dan keyin ikkinchi o‘rinda turibdi. Bu ko‘rsatkich bilan Margo Tom Kruz (45 million dollar) ni ortda qoldirdi. Demak, ijobiy tomonga o‘zgarishlar bor.

Uch karra “Oskar” mukofoti sohibi Meril Strip shunday deydi: “O‘tgan asrga nisbatan hozirda oz bo‘lsa-da, taraqqiyot bor. Bugungi kunda dunyoning eng nufuzli yulduzlari orasida ayollar yuqori pog‘onalarni egallamoqda”, dedi u.

Forbes jurnali ma’lumotlariga ko‘ra, Adam Sendler 2023-yilda haftasiga 1,4 million dollar ishlab topgan, bu daromad uning “Happy Madison” nomli prodyuserlik kompaniyasi 2020-yilda Netflix bilan to‘rtta film bo‘yicha shartnoma imzolagani tufayli ortdi. Biroq u Jennifer Eniston bilan birga ishtirok etgan “Qotillik siri-2” filmi past natijalar ko‘rsatdi va 2023-yilning birinchi yarmida eng ko‘p tomosha qilingan filmlar 40 taligiga ham kira olmadi.

Million dollar miqdorda gonorar olgan birinchi aktrisa — britaniyalik yulduz Elizabet Teylor bo‘lgan. Unga 1963-yilda “Kleopatra” filmida bosh rolni taklif etishgan. Loyihaga rozi bo‘lishni istamagan Teylor o‘ta katta miqdorda maosh — million dollar so‘ragan. Ajablanarlisi, studiya bunga rozi bo‘lgan.

Uill Smitga 2012-yilda “Qora libosdagi odamlar-3” filmi uchun 100 million dollar, 2018-yilda Robert Dauniga “Qasoskorlar: Cheksizlik urushi” filmida “Temir odam” roliga qaytishi uchun 75 million dollar to‘langan. Gollivudning barcha davrlardagi eng katta maoshlari o‘ntaligida faqat bitta ayol bor: 2013-yilda “Gravitatsiya” ilmiy-fantastik trilleri uchun Sandra Bullok 70 million dollar gonorar olgan.

San Diyego universiteti qoshidagi televideniye va kino sohasida ayollarni o‘rganish markazi tomonidan joriy yilda e’lon qilingan statistik ma’lumotlarga ko‘ra, prodyuserlarning atigi 21 foizini ayollar tashkil etadi. Rejissyorlarning 16 foizi, ssenariy mualliflarining 17 foizi ayollardir. Ammo gonorar miqdorini aniqlaydigan hamda film suratga olishda aktyorlarni yollaydigan prodyuserlarning aksariyati erkaklardir. Shu sababli Barbi rejissyori Greta Gervig “Oskar”ga nomzod bo‘lmagani uchun ko‘plab ayollar bundan g’azablandi. Ehtimol, bu muammo Kino akademiyasining 67 foizini erkaklar tashkil etishi bilan bog‘liqdir.

Darhaqiqat, 2024-yil “Oskar” sovrindori, “Bechoralar va baxtsizlar” (117 million dollar) filmi yulduzi Emma Stoun ham kuchli 10 talikka kira olmadi. Mett Deymon va Ben Afflek Nike krossovkalari haqidagi “Havo” filmi unchalik mashhur bo‘lmaganiga qaramay, Emma Stounda ko‘proq daromad (42 va 37 million dollar) olishdi.

Shuningdek, top-10 ta yuqori daromad olgan yulduzlar reytingiga har biri 41 million dollar ishlab topgan Jeyson Steytem va Leonardo Di Kaprio hamda 23 million dollar bilan Denzel Vashington kabi aktyorlar ham kiritildi.