Misrdan gepatit C ga qarshi dori vositalarining o‘n to‘rtinchi partiyasi O‘zbekistonga yetkazildi, deb xabar bermoqda “Dunyo” AA.
Ma’lum qilinishicha, 19-avgust kuni jami 80 dona qutida 1280 ta “Daklatasvir-60 mg” dori vositalari olib kelindi. Ushbu dorilar Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.
Ushbu tadbir prezidentning 2023-yil 20-21-fevral kunlari Misrga rasmiy tashrifi hamda ikki mamlakat sog‘liqni saqlash vazirliklari o‘rtasida o‘tkazilgan muzokaralar chog‘ida tuzilgan shartnomalarga muvofiq amalga oshirilmoqda.
Qayd etilishicha, Misr gepatitning B va C turi viruslariga qarshi kurashda dunyo miqiyosida sezilarli muvaffaqiyatlarga erishgan. Misr sog‘liqni saqlash vazirligi maʼlumotlariga ko‘ra, mamlakat aholisi ushbu kasallikdan butunlay forig‘ etilgan bo‘lib, Misr olimlari bu boradagi tajribasini o‘zbek mutaxassislari bilan o‘rtoqlashishga tayyor.
O‘zbekistonning Misrdagi elchixonasi xabariga ko‘ra, Misr Sog‘liqni saqlash vazirligi 5—8-sentabr kunlari Qohirada o‘tkaziladigan “Aholi, salomatlik va rivojlanish bo‘yicha global kongres” ishida O‘zbekiston sog‘liqni saqlash vaziri Amrillo Inoyatov ishtirok etishini kutmoqda. Ushbu tashrif doirasida o‘zaro hamkorlik ko‘lamini kengaytirish masalalari muhokama qilinadi.
Ushbu dori vositalarini yetkazib berish 29-aprel kuni boshlangandi. 12-avgust kuni dorilarning 13-partiyasi yetkazib berildi.
Izoh (0)