Бугун, 6 август куни Америка Қўшма Штатлари президентининг Украина бўйича махсус вакили Стив Уиткофф Кремлда Россия президенти Владимир Путин билан музокаралар ўтказди. Бу ҳақда Reuters агентлиги хабар берди.
Учрашув АҚШ президенти Дональд Трамп томонидан Владимир Путинга белгиланган 10 кунлик муҳлат тугашига 2 кун қолганида бўлиб ўтди. Бу муҳлат ичида Кремль Украинада тинчлик ўрнатиш масаласида олдинга қадам ташламаса, Россияга янги санкциялар жорий қилиниши мумкин.
Қайд этилишича, тинчликка эришишда ижобий силжиш бўлмаётгани учун Трампнинг Путиндан ҳафсаласи пир бўлган. АҚШ президенти Россия маҳсулотларини сотиб олаётган давлатларга оғир божлар жорий қилиш билан таҳдид қилмоқда. Айниқса, Россия нефтининг йирик харидорлари бўлган Ҳиндистон ва Хитой босим остига олинмоқда. Кремль эса бу каби таҳдидларни халқаро ҳуқуққа зид деб ҳисоблайди.
Ҳозирча Россия Трампнинг таҳдидларини бартараф этиш учун Уиткоффга нима таклиф қилиши мумкинлиги номаълум. Bloomberg ва Россиянинг мустақил нашри Тhе Bell хабарига кўра, Кремль Россия ва Украина ўртасида ҳаво ҳужумларига мораторий жорий этиш таклифини ўртага ташлаши мумкин.
Ҳаво орқали ҳужумларни чеклаш АҚШ ва Украина узоқ вақтдан бери талаб қилиб келаётган тўлиқ ва дарҳол сулҳга эришиш режасига тўғри келмайди. Бироқ бу ҳар икки томон учун қисқа муддатли енгиллик бўлиши мумкин.
Ортда қолган ҳафтада Россия ҳаво кучлари тинчлик музокаралари бошлангандан бери кузатилган энг йирик ҳаво ҳужумини амалга оширди. Зарбалар оқибатида Киевнинг ўзида 72 киши ҳалок бўлган. Президент Трамп Россиянинг бу зарбаларини қаттиқ қоралаган.
Украина эса Россиянинг нефтни қайта ишлаш заводлари ва нефть омборларига зарба беришни фаол тарзда давом эттирмоқда.
Владимир Зеленский маъмуриятининг раҳбари Андрий Ермак ўт очишни тўхтатишни ва Россия ҳамда Украина етакчилари иштирокида саммит ўтказишни зарур деб ҳисоблашини билдирган.
“Уруш тўхташи керак. Бу масъулият Россиянинг зиммасида”, деб ёзган Ермак Telegram’даги расмий саҳифасида.
Танқидчилар Стив Уиткоффни Путин билан юзма-юз музокараларда тажрибасиз, тайёргарликсиз инсон сифатида тасвирлайди ва уни Кремлнинг позициясини такрорлаётганликда айбламоқда.
Уиткоффнинг фикрича, Россия Украинани тўлиқ эгаллаб олишни истамайди. “Путин Европа ҳудудига бостириб кириши ҳақида ўйлаш эса шунчаки кулгидан бошқа нарса эмас” деган махсус вакил.
Европа давлатлари раҳбарлари эса мутлақо бошқача фикрда. Улар Путин ва Россияни минтақа учун реал таҳдид сифатида баҳолайди. Кремль эса Европанинг бундай муносабатини русофобия оқибати эканлигини таъкидлаб келади.
Изоҳ (0)