Joriy yil 25-iyul kuni Toshkent shahar Yakkasaroy tumani Yunus Rajabiy ko‘chasidagi archalarga o‘t ketdi. “Daryo” muxbiri suhbatda bo‘lgan hudud aholisi yong‘in uyushtirilganini aytmoqda.
Toshkent shahar FVBga soat 10:31 da 72-uy oldida yong‘in bo‘layotgani haqida xabar kelib tushgan. O‘t o‘chiruvchilar soat 10:36 da voqea joyiga yetib borib, yong‘inni 10:42 da o‘chirgan. Olov tez fursatda o‘chirilganiga qaramay, 7 ta archa daraxti yonib, zararlangan.
Hududda istiqomat qiluvchi Mahmud Abdiyev fikriga ko‘ra, olovni kimdir qasddan yoqqan bo‘lishi mumkin.
Daraxtlar deyarli har kuni fuqarolar tomonidan sug‘orib turiladi. Ertalab soat 10:20 larda hech qanday yong‘in alomatlari yo‘q edi. Sal turib chiqqanimda esa allaqachon “pojar” xodimlari o‘t o‘chirishayotgandi, deydi fuqaro Raʼno Zayniddinova.
Yana bir fuqaro Iskandar Kenjayevning aytishicha, yong‘in chiqishidan avval baland ovoz eshitilgan.
“Har kungiday ertalab o‘g‘lim bilan turnikda shug‘ullanish uchun ko‘chaga chiqdik. Besh daqiqa ichida kuchli paqillagan ovoz eshitildi. Shundan keyin hammayoqni kul qopladi. O‘g‘lim 10 daqiqa oldin bu yo‘ldan o‘tganida hech qanday yong‘in yo‘q edi. Menimcha, bu yerga kimdir nimadir qo‘ygan. Balki u yonadigan suyuqlik bo‘lishi ham mumkin. Shuning oqibatida yong‘in sodir bo‘lgan”, deya fikr bildirdi u.
Maʼlumotlarga ko‘ra, 2018-yilda Yunus Rajabiy ko‘chasida Golden House va Britaniyaning Benoy arxitektura byurosi turar joy kompleksi qurishni rejalashtirgan edi. 2020-yilda sobiq teatr instituti hududi panjara bilan o‘ralgan. Aholi keskin norozilik bildirgach, qurilish ishlari boshlanmay to‘xtatilgan.
Hozirda mazkur hududga egalik huquqi aynan Golden House kompaniyasiga tegishli. “Daryo” ixtiyorida sodir bo‘lgan yong‘in tabiiy ravishda yoki atay uyushtirilganini tasdiqlovchi maʼlumotlar mavjud emas. Biroq hudud aholisi yong‘in juda tez sodir bo‘lgani va avvaldan rejalashtirilgan bo‘lishi mumkinligini aytmoqda. Masʼul idoralardan holatni sinchkovlik bilan o‘rganishni so‘rab qolamiz.
Bundan uch kun oldin (23-iyul) Toshkent viloyati Qibray tumanida ham yong‘in sodir bo‘lgandi. “Daryo” muxbiri voqea joyiga borib o‘rganganda, olov qurilish mollari do‘koni va aholi yashash xonadonlarini zararlagani aniqlangan.
Izoh (0)