Ijtimoiy tarmoqlarda Andijon viloyati Buloqboshi tumanidagi Janubiy Farg‘ona kanali zaharli ko‘pikka to‘lib oqayotgani haqida xabarlar tarqaldi.
“Aytishlaricha, kanalda sanoat oqovasi oqizilmoqda ekan. Dahshatli tomoni, bu suvdan aholi iste’mol qiladi, ekinlarini sug‘oradi”, deyiladi xabarlarda.
“Daryo” muxbiri masalaga aniqlik kiritish maqsadida viloyat ekologiya boshqarmasi matbuot kotibi Lochinbek Isomiddinov bilan bog‘landi. Mas’ulning aytishicha, holat hamkor tashkilotlar bilan birgalikda o‘rganilmoqda.
Bundan xabarimiz bor. Xodimlarimiz suvdan namuna olib kelib, o‘rganish uchun laboratoriyaga berdi. Bu ko‘piklar “kraska” bilan bog‘liq emas. Katta ehtimol bilan, kimdir “poroshok” tashlagan yoki to‘kib yuborgan degan taxmindamiz. Nafaqat Xo‘jaobod, Buloqboshi tumanidagi xodimlarimiz, balki boshqa tashkilot va idoralar ham kanal bo‘ylab sinchkovlik bilan o‘rganish o‘tkazmoqda. Yakuniy xulosa bo‘yicha batafsil ma’lumot beriladi, deydi Lochinbek Isamuddinov.
“Andijon suv ta’minoti” AJ Telegram-kanalida tarqalgan xabar haqiqatga to‘g‘ri kelmasligini, ko‘pik tabiiy ravishda hosil bo‘lganini ma’lum qildi.
“Murojaatda ushbu manzilda joylashgan sanoat zonasidan ajrab chiqqan oqova suv kanalga oqizilishi natijasida suvda ko‘pik hosil bo‘layotgani ma’lum qilingan edi. O‘rganish davomida esa ushbu hududda hech qanday sanoat zonasi mavjud emasligi aniqlandi. Suv yuzidagi ko‘pikning hosil bo‘lishi tabiiy jarayon bo‘lib, bu suv bosimining tezligi bilan bog‘liq hodisadir”, deyiladi munosabatda.
Biroq qisqa muddatdan so‘ng munosabat o‘chirilib, ko‘pik tabiiy jarayon natijasida hosil bo‘lgani haqidagi ma’lumot olib tashlangan holda suratlar bilan qaytadan joylashtirildi.
“Daryo” muxbirining aniqlashicha, holat 26-iyul kuni soat 9–10 larda Buloqboshi tumanining Shirmonbuloq qishlog‘i hududida yuz bergan.
“Soat 9-10 lar atrofida mahallamiz Telegram guruhida hamqishloqlarimiz internetda tarqalgan videolarni yuborishdi. Shundan so‘ng mahalla raisi kanaldagi suvdan foydalanmasdan turishni, tegishli tashkilotlar o‘rganayotganini bildirdi. Bu birinchi holat emas. Oyda-yilda bir shunaqa bo‘ladi. Oxirgi marotaba bundan bir-ikki oy avval ham kanalda rangli narsalar oqib kelgandi. Hokimlik o‘rganyapmiz, dedi. Keyin nima bo‘lgan, bilmaymiz. O‘n minglab aholining hayotiga xavf solayotgan bu holatni kimdir hal qilishi kerak”, deydi ismi sir qolishini so‘ragan fuqaro.
Keyinroq holat yuzasidan Buloqboshi tumani hokimligi ham munosabat bildirdi. Ma’lum qilinishicha, jarayon Andijon viloyat prokuraturasi tomonidan nazoratga olingan. O‘rganish natijalari bo‘yicha qo‘shimcha ma’lumot beriladi.
May oyi boshida Buloqboshi tumanidan oqib o‘tuvchi ushbu Janubiy Farg‘ona kanali qirg‘og‘i o‘pirilib, suv toshib chiqqandi. Talafotlar o‘rganilganda jami 560 ta xonadonni suv bosgani ma’lum bo‘lgandi.
Izoh (0)